متحدہ عرب امارات میں مقیم بھارتیوں کے لیے اہم اعلان: ای پاسپورٹ کے لیے نئی ویب سائٹ کا آغاز

خلیج اردو
ابوظہبی: متحدہ عرب امارات میں مقیم بھارتی شہری اب چِپ سے مزین ای پاسپورٹ کے لیے نئی آن لائن پورٹل کے ذریعے درخواست دے سکیں گے۔ بھارتی سفارتخانے نے منگل 28 اکتوبر سے اس سہولت کا باضابطہ آغاز کردیا۔

سفارتخانے کے اعلان کے مطابق تمام بھارتی پاسپورٹ درخواست گزاروں کے لیے اب تمام پاسپورٹ سے متعلق خدمات کے لیے نئی ویب سائٹ کا استعمال لازمی ہوگا۔
ویب سائٹ کا پتہ یہ ہے: [https://mportal.passportindia.gov.in/gpsp/AuthNavigation/Login](https://mportal.passportindia.gov.in/gpsp/AuthNavigation/Login)

دبئی اور شمالی امارات کے درخواست گزاروں کے لیے بھارتی قونصلیٹ دبئی نے بھی یہی اعلان جاری کیا ہے۔
نیا پاسپورٹ سیوا پروگرام (GPSP 2.0) جدید فیچرز کے ساتھ متعارف کرایا گیا ہے جس میں ڈیجیٹل ڈیٹا پر مشتمل ایک چِپ والا ای پاسپورٹ شامل ہے، جو عالمی سطح پر امیگریشن کے عمل کو مزید آسان اور تیز بنائے گا۔

نئی درخواست کا طریقہ کار
سفارتخانے اور قونصلیٹ نے متحدہ عرب امارات میں بھارتی پاسپورٹ سے متعلق تمام خدمات کے لیے نیا طریقہ کار بھی جاری کیا ہے۔
درخواست گزار پورٹل پر "Register” کے بٹن کے ذریعے نیا اکاؤنٹ بنا کر لاگ ان کرسکیں گے، جس کے بعد وہ "Applicant Home Page” سے نئی درخواست تیار کر کے جمع شدہ فارم پرنٹ کرسکتے ہیں۔

آن لائن فارم جمع کرانے کے بعد درخواست گزاروں کو بی ایل ایس انٹرنیشنل سینٹرز (BLS International) میں اپائنٹمنٹ بک کرنی ہوگی، جو بھارتی پاسپورٹ اور ویزا درخواستوں کے لیے مجاز سروس فراہم کنندہ ہے۔
اپائنٹمنٹ اس لنک کے ذریعے حاصل کی جاسکتی ہے: [https://indiavisa.blsinternational.com/uae/appointment/bls_appmnt/login](https://indiavisa.blsinternational.com/uae/appointment/bls_appmnt/login)

اپائنٹمنٹ بک ہونے کے بعد درخواست گزاروں کو متعلقہ بی ایل ایس انٹرنیشنل سینٹر پر تمام ضروری دستاویزات کے ساتھ ذاتی طور پر جانا ہوگا۔