متحدہ عرب امارات اور گوگل کا "اے آئی فار آل” پروگرام، ہر عمر کے افراد کے لیے مصنوعی ذہانت کی تربیت کا آغاز

خلیج اردو

دبئی: متحدہ عرب امارات کے آفس آف آرٹیفیشل انٹیلی جنس، ڈیجیٹل اکانومی اور ریموٹ ورک ایپلیکیشنز نے گوگل کے اشتراک سے "AI for All” کے نام سے ایک قومی منصوبہ شروع کیا ہے، جس کا مقصد ہر عمر اور پیشے سے تعلق رکھنے والے افراد کو مصنوعی ذہانت (اے آئی) کی مہارتوں سے آراستہ کرنا ہے۔ یہ اعلان یو اے ای کوڈنگ ڈے (UAE Codes 2025) کے موقع پر کیا گیا، اور پروگرام 2026 تک مرحلہ وار نافذ کیا جائے گا۔

اس اقدام کے تحت ملک بھر میں مفت تعلیمی پروگرامز اور ورکشاپس کے ذریعے شہریوں کو مصنوعی ذہانت کی بنیادی سمجھ اور عملی تربیت فراہم کی جائے گی۔ یہ منصوبہ متحدہ عرب امارات کے اس بڑے وژن کا حصہ ہے جس کے تحت ملک کو اختراع، ٹیلنٹ اور جدید ٹیکنالوجی کا عالمی مرکز بنانا مقصود ہے۔

پبلک فرسٹ کی 2025 رپورٹ کے مطابق، جنریٹیو اے آئی متحدہ عرب امارات کی معیشت میں تقریباً 298 ارب درہم کا اضافہ کر سکتی ہے، جو ڈیجیٹل مہارتوں کی بڑھتی ہوئی اہمیت کو ظاہر کرتا ہے۔

وزیر مملکت برائے مصنوعی ذہانت، ڈیجیٹل اکانومی اور ریموٹ ورک ایپلیکیشنز عمر سلطان العلماء نے کہا کہ گوگل کے ساتھ یہ اشتراک یو اے ای کے مستقبل کے وژن کی عکاسی کرتا ہے، جس کا مقصد معاشرے کو مستقبل کی ٹیکنالوجی سے بااختیار بنانا ہے۔ ان کے مطابق "یہ شراکت داری نہ صرف سرکاری و نجی اداروں کے تعلقات کو مضبوط بناتی ہے بلکہ ایک ایسی ڈیجیٹل معیشت کے قیام میں مدد دیتی ہے جہاں ہر فرد مصنوعی ذہانت سے مستفید ہو سکے۔”

گوگل مینا کے مینیجنگ ڈائریکٹر انتھونی نکاشے نے کہا کہ یہ اقدام اس یقین پر مبنی ہے کہ مصنوعی ذہانت کے فوائد سب کے لیے دستیاب ہونے چاہییں۔ انہوں نے کہا کہ "طلبہ کو جدید Gemini ماڈلز تک رسائی، چھوٹے کاروباروں کو ترقی کے آلات، اور اساتذہ و صحافیوں کی معاونت کے ذریعے ہم ایک ایسے مستقبل کی بنیاد رکھ رہے ہیں جہاں ہر فرد محفوظ اور پُراعتماد انداز میں اے آئی اکانومی کا حصہ بن سکے۔”

"اے آئی فار آل” پروگرام کے تحت متعدد تربیتی کورسز متعارف کرائے جائیں گے جن میں طلبہ، ملازمین، مواد تخلیق کرنے والوں اور عام عوام کو اے آئی کے محفوظ اور ذمہ دارانہ استعمال کی تعلیم دی جائے گی۔
تربیتی مواد میں درج ذیل مضامین شامل ہوں گے:
• جنریٹیو اے آئی ٹولز کے لیے مؤثر پرامپٹس لکھنے کی مہارت
• تخلیقی اور پیداواری مقاصد کے لیے اے آئی کا استعمال
• پرائیویسی اور ڈیٹا پروٹیکشن کے بنیادی اصول
• چھوٹے اور درمیانے درجے کے کاروباروں (SMEs) کے لیے خصوصی تربیت کہ کس طرح اے آئی ان کی ترقی، کارکردگی اور آپریشنز کو بہتر بنا سکتی ہے۔