خلیج اردو
شارجہ: شارجہ سٹی میونسپلٹی نے شارجہ ایگزیکٹو کونسل کے نئے فیصلے کی تفصیلات جاری کر دی ہیں، جس کے تحت امارت بھر میں غیر تصدیق شدہ کرایہ ناموں کی تصدیق پر 50 فیصد رعایت دی جائے گی۔ یہ اقدام حکومت کی جانب سے رہائشیوں اور سرمایہ کاروں پر مالی بوجھ کم کرنے اور انہیں تعاون فراہم کرنے کے لیے اٹھایا گیا ہے۔ اس سہولت سے فائدہ اٹھانے کے لیے 1 نومبر سے 31 دسمبر 2025 تک دو ماہ کا وقت دیا گیا ہے، جس دوران مالکان اور کرایہ دار اپنے پرانے غیر تصدیق شدہ معاہدے باقاعدہ کرا سکتے ہیں۔
شارجہ سٹی میونسپلٹی کے ڈائریکٹر کسٹمر سروسز خالد بن فلاح السویدی نے شارجہ ٹی وی کے پروگرام “دیریکٹ لائن” میں گفتگو کرتے ہوئے بتایا کہ یہ رعایت دو ماہ کے لیے ہوگی اور اس سے تمام افراد اور کاروباری ادارے فائدہ اٹھا سکتے ہیں۔ ان کے مطابق “یہ حکومت کی جانب سے عوام اور سرمایہ کاروں کی ضروریات کے پیش نظر سمجھداری پر مبنی قدم ہے۔”
انہوں نے کہا کہ “ماضی میں کئی افراد نے رعایت یا اقساط کی درخواست کی تھی کیونکہ وہ مختلف وجوہات کی بنا پر اپنے کرایہ ناموں کی تصدیق نہیں کروا سکے تھے، اس لیے حکومت نے اب ان کے لیے یہ موقع فراہم کیا ہے تاکہ سب اس سے فائدہ اٹھا سکیں۔”
تمام اقسام کے معاہدے شامل
السویدی نے تصدیق کی کہ یہ فیصلہ تمام اقسام کے کرایہ ناموں پر لاگو ہوگا، خواہ وہ رہائشی، تجارتی، صنعتی یا سرمایہ کاری کے معاہدے ہوں۔ یہ رعایت ان معاہدوں پر بھی لاگو ہوگی جو شارجہ کے 2024 کے کرایہ قانون کے اجراء سے پہلے ختم ہو چکے تھے۔
مستفید ہونے والے افراد اپنی دستاویزات کی تصدیق کسی بھی مجاز مرکز کے ذریعے یا “عقاری” ڈیجیٹل پلیٹ فارم سے کروا سکیں گے، جو امارت میں پراپرٹی سے متعلقہ تمام خدمات کے لیے مرکزی آن لائن نظام کے طور پر کام کرتا ہے۔
