خلیج اردو
ابوظبی — متحدہ عرب امارات میں مقیم 29 سالہ بھارتی آئی ٹی پروفیشنل انل کمار بولا نے 10 کروڑ درہم کی لاٹری جیتنے کے بعد بھی کام جاری رکھنے اور کم از کم آئندہ دس سال تک امارات میں رہنے کا فیصلہ کیا ہے۔
تلنگانہ، بھارت سے تعلق رکھنے والے انل کمار کا کہنا ہے کہ وہ اس رقم کو سمجھداری سے خرچ اور سرمایہ کاری میں استعمال کریں گے۔ ’’میں سب سے پہلے اپنے والدین اور بھائی کو امارات بلاؤں گا تاکہ ہم سب اکٹھے رہ سکیں۔‘‘
ان کا کہنا تھا کہ ’’میں چاہتا ہوں کہ میرے والدین بھی یہاں کی محفوظ اور پرسکون زندگی کا حصہ بنیں۔ میں خود جا کر انہیں یہ خوشخبری دینا چاہتا ہوں تاکہ ان کی آنکھوں میں خوشی دیکھ سکوں۔‘‘
انل کمار کے مطابق یہ لمحہ ناقابلِ یقین تھا جب 18 اکتوبر کو انہیں لاٹری ٹیم کی جانب سے فون آیا۔ ’’میں نے پانی پیا، خود کو پرسکون کیا، اور پھر خاموشی سے خوشی منائی۔‘‘
ملک کی تاریخ کی سب سے بڑی انعامی رقم جیتنے کے بعد انہوں نے کہا کہ وہ غیر ضروری اخراجات کے بجائے سمجھداری سے سرمایہ کاری کریں گے۔ ’’میں جزیرے یاس یا سادیات میں گھر خریدنے اور آئی ٹی کنسلٹنسی بزنس شروع کرنے کا ارادہ رکھتا ہوں۔‘‘
ان کا کہنا ہے کہ وہ کچھ رقم فلاحی کاموں میں بھی عطیہ کریں گے۔ ’’میں اس انعام کو ایک برکت سمجھتا ہوں، اور اس کا حصہ دوسروں کے ساتھ بانٹنا حقیقی خوشی دیتا ہے۔‘‘
