دبئی ایئرشو کا المناک حادثہ: بھارتی طیارہ تیجس کے کریش کی ممکنہ وجہ سامنے آگئی

خلیج اردو
دبئی ایئرشو کے آخری روز بھارتی لڑاکا طیارہ تیجس حادثے کا شکار ہوا جس میں پائلٹ جان کی بازی ہار گیا۔ واقعہ دوپہر 2 بج کر 10 منٹ پر اس وقت پیش آیا جب طیارہ ایک کرتب دکھا رہا تھا۔ ابتدائی تجزیے کے مطابق حادثے کی ممکنہ وجہ طیارے کا حد سے زیادہ نیچی پرواز میں کرتب دکھانا ہو سکتی ہے۔

لندن میں قائم اسٹریٹیجک ایرو ریسرچ کے چیف اینالسٹ سجاد احمد نے خلیج ٹائمز سے گفتگو میں بتایا کہ ایسا لگتا ہے کہ کرتب بہت نیچی بلندی پر کیا گیا اور پائلٹ کے پاس لوپ مکمل کرنے کے بعد زمین سے محفوظ فاصلہ برقرار رکھنے کے لیے درکار جگہ نہ رہی، جس کے باعث طیارہ زمین سے ٹکرا گیا۔ ان کے مطابق واقعہ ابھی ابتدائی تحقیقات کے مرحلے میں ہے، تاہم خوش قسمتی سے یہ پورا منظر مختلف کیمروں میں ریکارڈ ہو چکا ہے، جو تحقیق میں معاون ثابت ہوگا۔

تیجس ہندوستان کا مقامی طور پر تیار کردہ سنگل انجن ملٹی رول ہلکا لڑاکا طیارہ ہے۔ ایرو ناٹیکل ڈیولپمنٹ ایجنسی نے اسے ڈیزائن کیا جبکہ ہندوستان ایرو ناٹیکس لمیٹڈ نے تیار کیا۔ ڈیلٹا ونگ اور ٹیل لیس ڈیزائن نے اسے اپنے درجے میں انتہائی ہلکا اور تیز رفتار سپر سونک طیارہ بنایا، جو اعلیٰ پھرتی اور مانورنگ کی صلاحیت رکھتا ہے۔ اس کا منصوبہ 1980 کی دہائی میں پرانے میگ 21 طیاروں کی جگہ لینے کے لیے شروع کیا گیا تھا، اور 2001 میں اس نے پہلی آزمائشی پرواز کی۔

بھارتی فضائیہ اس سال کے ایئرشو میں سوریہ کرن ایروبٹک ٹیم اور تیجس طیارے کے ساتھ شریک تھی۔ دنیا کے دیگر ایئر شوز میں بھی ماضی میں سنگین حادثات پیش آ چکے ہیں، البتہ دبئی ایئرشو میں یہ اپنی نوعیت کا پہلا بڑا حادثہ ہے، جو 1986 سے منعقد ہو رہا ہے۔

سجاد احمد کے مطابق واقعے کی عوامی نوعیت ممکنہ طور پر یہ مطالبہ بڑھا سکتی ہے کہ ایئر شوز میں خطرناک اور ضرورت سے زیادہ پیچیدہ کرتب کم کیے جائیں۔