خلیج اردو
متحدہ عرب امارات کی وزارتِ خارجہ نے موسمِ سرما کی تعطیلات اور اسکولوں کی چھٹیوں کے پیش نظر ’’فرام دی یو اے ای، وی ٹریول‘‘ مہم کا آغاز کر دیا ہے۔ یہ مہم 8 دسمبر 2025 سے 4 جنوری 2026 تک جاری رہے گی، جس کا مقصد محفوظ، مؤثر اور باخبر سفر کو یقینی بنانا ہے۔ وزارت نے کہا ہے کہ تمام مسافروں کو سہولت فراہم کرنے کے لیے ڈیجیٹل خدمات اور ہیلپ لائنز 24 گھنٹے فعال رہیں گی۔
اہم سفری ہدایات
وزارت نے شہریوں اور رہائشیوں کو ہدایت کی ہے کہ وہ روانگی سے قبل سفری مشوروں کی تازہ ترین معلومات وزارتِ خارجہ کی ویب سائٹ یا اسمارٹ ایپ سے حاصل کریں۔ پاسپورٹ کم از کم چھ ماہ کے لیے قابلِ استعمال ہوں، سفر کرنے والوں کے ویزے پہلے سے حاصل کیے جائیں، ہر ملک کے داخلے کے اصول چیک کیے جائیں اور پوری مدت کا بین الاقوامی ہیلتھ انشورنس لازمی لیا جائے۔
مسافروں کو یہ بھی ہدایت کی گئی ہے کہ مقامی قوانین، ٹریفک ضابطوں اور ہنگامی ہدایات پر عمل کریں، اہم دستاویزات کی الیکٹرانک کاپیاں محفوظ رکھیں، جبکہ اصل کاغذات کو سیکیورڈ جگہ پر رکھا جائے۔ ہوٹل، فلائٹس اور کار رینٹل بکنگ ہمیشہ معتبر بین الاقوامی ایجنسیوں سے کرائی جائے اور بھیڑ والے مقامات میں قیمتی سامان رکھنے سے گریز کیا جائے۔
تواجودی رجسٹریشن اور ہیلپ لائن
یو اے ای کے شہریوں کو وزارت کی ’’تواجودی‘‘ سروس میں خود کو اور اپنے خاندان کو رجسٹر کرنے کی ہدایت کی گئی ہے۔ بیرونِ ملک موجود شہری کسی بھی ہنگامی صورتحال میں 0097180024 ہیلپ لائن پر رابطہ کر سکتے ہیں، جو 24 گھنٹے دستیاب ہے۔
ائرپورٹس پر ’’یو اے ای ٹریولر سروسز کارڈ‘‘ بھی فراہم کیا جائے گا، جس میں موجود کیو آر کوڈ کے ذریعے مسافر مندرجہ ذیل سہولیات حاصل کر سکیں گے:
کھوئے، خراب یا ایکسپائر پاسپورٹ پر 30 منٹ میں ریٹرن ڈاکیومنٹ کا اجرا،
ہر ملک کے تازہ ترین سفری تقاضوں تک فوری رسائی،
سال 2025 کے تمام اپ ڈیٹ شدہ داخلے کے رہنما اصول۔
گولڈن ویزا ہولڈرز کے لیے خصوصی سہولیات
وزارتِ خارجہ اور متعلقہ حکام گولڈن ویزا رکھنے والے مسافروں کے لیے ہنگامی پاسپورٹ، 24 گھنٹے ہیلپ لائن، بیرونِ ملک جان لیوا حادثات کی صورت میں مدد، وطن واپسی اور تدفین کی سہولیات بھی فراہم کریں گے۔
مہم کا مقصد
وزارتِ خارجہ کا کہنا ہے کہ ’’فرام دی یو اے ای، وی ٹریول‘‘ مہم کا مقصد موسمِ سرما کی تعطیلات کے دوران محفوظ، پرسکون اور ذمہ دارانہ سفر کو یقینی بنانا ہے۔ مسافروں کو مشورہ دیا گیا ہے کہ وہ پیشگی منصوبہ بندی کریں اور وزارت کی ڈیجیٹل خدمات سے فائدہ اٹھا کر اپنا سفر بے فکر اور آسان بنائیں۔
