شارجہ میں نیشنل ڈے سے قبل بلیک پوائنٹس ختم کرنے کا اعلان

خلیج اردو
شارجہ پولیس نے یوم اتحاد (عید الاتحاد) کی مناسبت سے ایک اہم اقدام کا اعلان کیا ہے، جس کے تحت مخصوص مدت کے دوران جرمانے ادا کرنے والے موٹر سائیکل سواروں اور ڈرائیوروں کے ٹریفک بلیک پوائنٹس ختم کر دیے جائیں گے۔

ٹریفک اینڈ پیٹرولز ڈیپارٹمنٹ کے ڈائریکٹر بریگیڈیئر خالد محمد الکی نے یہ اعلان پروگرام ’’الخط المباشر‘‘ کے دوران کیا۔ انہوں نے بتایا کہ یکم دسمبر 2025 سے 10 جنوری 2026 تک ادا کیے جانے والے ٹریفک جرمانوں پر بلیک پوائنٹس ختم کر دیے جائیں گے۔ تاہم یہ سہولت سنگین خلاف ورزیوں پر لاگو نہیں ہوگی۔ بلیک پوائنٹس صرف ان خلاف ورزیوں کے لیے ختم ہوں گے جو یکم دسمبر 2025 سے پہلے ریکارڈ ہو چکی ہیں۔

شارجہ پولیس کے مطابق ٹریفک خلاف ورزیوں پر 35 فیصد رعایت بدستور جاری رہے گی، جو خلاف ورزی کے 60 دن کے اندر جرمانہ ادا کرنے پر دی جاتی ہے۔ یہ رعایت مالی جرمانے، گاڑی ضبطی کی مدت اور ضبطی فیس پر بھی لاگو ہوتی ہے۔

60 دن کے بعد اور ایک سال کے اندر جرمانہ ادا کرنے پر 25 فیصد رعایت ملے گی، مگر یہ رعایت صرف مالی جرمانے تک محدود ہوگی۔ سنگین ٹریفک خلاف ورزیاں اور ان سے منسلک ٹریفک پوائنٹس ان رعایتی اسکیموں سے مستثنیٰ ہیں۔