خلیج اردو
متحدہ عرب امارات میں نیشنل ڈے کی طویل تعطیلات نے ملک بھر میں خوشی، تفریح اور خاندانی میل جول کا ماحول بنا دیا۔ ہفتہ اور اتوار کے ساتھ پیر اور منگل کی سرکاری تعطیلات سے مجموعی طور پر چار روزہ بریک نے شہریوں کو بیرونی سرگرمیوں، ساحلوں، تفریحی مقامات اور گھریلو میل جول کا منفرد موقع فراہم کیا۔ ملک کے مختلف شہروں میں پارکس بھرے رہے، فیسٹیولز کا انعقاد ہوا، آتشبازی نے فضاؤں کو رنگین کیے رکھا اور خصوصی ڈسکاؤنٹس نے مجموعی ماحول کو مزید خوشگوار بنا دیا۔
دبئی ہلز میں مقیم قازق شہری کارینا شاشکووا نے اپنے دوستوں کے ساتھ سیکرٹ سانتا کی تقریب کو ’’گھر جیسی گرم جوشی‘‘ قرار دیا۔ تحائف کے تبادلے، باربی کیو، ہنسی مذاق اور خاندانوں کے درمیان چھوٹی قرعہ اندازی نے تقریب کو مزید یادگار بنا دیا۔ کارینا کے مطابق سردیوں کی طویل چھٹیوں سے پہلے یہ ملاقاتیں خاندانی اور سماجی رشتوں کو مضبوط بنانے کا ذریعہ بنیں۔
العین میں شامی نژاد اہام جوراتلی اور ان کے خاندان نے کھلے آسمان تلے چھٹیوں کا لطف اٹھایا۔ انہوں نے العین کے پارکس، ایئر شو اور مختلف ثقافتی سرگرمیوں کو اپنے بچوں کے ساتھ بھرپور انداز میں انجوائے کیا۔ ان کا کہنا تھا کہ نیشنل ڈے کا ایئر شو اور پرچم کے رنگوں سے سجی فضائیں ہر سال ان کے خاندان کے لیے اتحاد اور فخر کا احساس تازہ کر دیتی ہیں۔
دوسری جانب کچھ خاندانوں نے شہری ماحول سے دور پہاڑی علاقے کا رخ کیا۔ گیتیکا تلوارکر اور ان کا گروپ بیئر گرلز کیمپ میں قیام پذیر رہا جہاں دو روزہ ہائیکنگ، باربی کیو، قدرتی ماحول اور کنٹینر اسٹائل رہائش نے ان کے لیے ایک دلکش اور سادہ مگر یادگار تجربہ فراہم کیا۔ بچوں نے باہر کی سرگرمیوں سے بھرپور لطف اٹھایا جبکہ چھٹی کے آخری روز یہ خاندان گھر پر دوستانہ میل جول کا پروگرام مکمل کر رہے ہیں۔
ملک بھر میں نیشنل ڈے کی خوشیاں، آتشبازی، ڈرون شوز، ثقافتی پروگراموں اور خاندانی سرگرمیوں کے ساتھ متحدہ عرب امارات میں رہنے والوں کے لیے اتحاد، فخر اور یکجہتی کے لمحات ثابت ہوئیں۔
