خلیج اردو
ابوظبی: متحدہ عرب امارات کے صدر، عزت مآب شیخ محمد بن زاید النہیان، امارات کے حکمرانوں، ولی عہدان، نائب حکمرانوں اور شیوخ کے ہمراہ زاید نیشنل میوزیم میں منعقدہ 54ویں عید الاتحاد کی سرکاری تقریب میں شریک ہوئے۔ ’متحد‘ کے عنوان سے منعقد ہونے والی اس تقریب میں ملک کے اتحاد، ورثے اور ترقی کے سفر کو خراجِ تحسین پیش کیا گیا۔
تقریب میں شرکت کرنے والوں میں عزت مآب شیخ محمد بن راشد المکتوم، نائب صدر، وزیراعظم اور حکمران دبئی؛ عزت مآب شیخ حمد بن محمد الشرقی، حکمران فجیرہ؛ عزت مآب شیخ سعود بن راشد المعلا، حکمران ام القیوین؛ عزت مآب شیخ سعود بن صقر القاسمی، حکمران راس الخیمہ؛ اور عزت مآب شیخ منصور بن زاید النہیان، نائب صدر شامل تھے۔
اس موقع پر ابوظبی کے ولی عہد شیخ خالد بن محمد بن زاید النہیان، دبئی کے ولی عہد اور نائب وزیراعظم و وزیر دفاع شیخ حمدان بن محمد بن راشد المکتوم، شارجہ کے نائب حکمران شیخ سلطان بن محمد بن سلطان القاسمی، عجمان کے ولی عہد شیخ عمار بن حمید النعیمی، فجیرہ کے ولی عہد شیخ محمد بن حمد الشرقی، ام القیوین کے نائب حکمران شیخ راشد بن سعود المعلا، راس الخیمہ کے ولی عہد شیخ محمد بن سعود القاسمی اور متعدد دیگر شیوخ و اعلیٰ حکام بھی موجود تھے۔
تقریب میں اتحاد کی روح، ملک کے ورثے اور مستقبل کے قومی اہداف کو اجاگر کیا گیا۔ بانیٔ متحدہ عرب امارات، مرحوم شیخ زاید بن سلطان النہیان کی خدمات اور ان کے قائم کردہ دائمی اصولوں کو خصوصی طور پر خراجِ عقیدت پیش کیا گیا۔
تقریب میں ملک کی تاریخ کی نمائندگی کرنے والے نایاب نوادرات کی نمائش بھی کی گئی، جن میں زاید نیشنل میوزیم کے ذخیرے سے شامل ابو ظبی پرل (تقریباً آٹھ ہزار سال قدیم)، ساروق الحدید سے دریافت شدہ کانسی کی تلواریں، پانچ ہزار سال پرانے کارنیلین منکے، علاقے میں استعمال کی جانے والی قدیم ابیئل سکّہ اور سمندری سفر میں استعمال ہونے والا روایتی ’کمل‘ آلات شامل تھے۔
اس کے علاوہ 1966 کا کرائیسلر نیوپورٹ، جسے مرحوم شیخ زاید نے استعمال کیا تھا، اور ’’مگان بوٹ‘‘ جسے قدیم بحری تجارت میں استعمال کیا جاتا تھا، بھی نمائش کا حصہ تھے۔
تقریب نے روشنیوں، روایتی اماراتی ملبوسات، آرکسٹرل موسیقی اور لوک رقص کے امتزاج کے ذریعے یو اے ای کی تاریخ کو تخلیقی انداز میں پیش کیا، جبکہ مختلف عمر اور پس منظر کے فنکاروں نے نسل در نسل جاری اس قومی سفر کو خراج تحسین پیش کیا۔
یو اے ای نیشنل آرکسٹرا نے بھی پہلی مرتبہ خصوصی پرفارمنس پیش کی، جس نے اتحاد، یکجہتی اور قومی جذبے کی عکاسی کی۔ تقریب کی براہِ راست نشریات سرکاری ڈیجیٹل پلیٹ فارمز کے ذریعے دنیا بھر میں پیش کی گئیں، تاکہ یو اے ای کو اپنا گھر سمجھنے والا ہر شخص اس قومی جشن میں شریک ہو سکے۔
