یو اے ای میں گھنا کہر، حدِ نگاہ خطرناک حد تک کم؛ بعض علاقوں میں بارش کا امکان

خلیج اردو
یو اے ای کے نیشنل سینٹر آف میٹرولوجی نے بدھ اور جمعرات کی درمیانی شب سے صبح تک شدید دھند کی وارننگ جاری کی ہے، جس کے باعث کئی ساحلی اور اندرونی علاقوں میں حدِ نگاہ صفر تک گر سکتی ہے۔ محکمہ موسمیات کے مطابق دھند کا سلسلہ رات 12:30 سے صبح 10 بجے تک رہے گا، اور شہریوں خصوصاً موٹر سائسٹوں سے اپیل کی گئی ہے کہ سفر کے دوران احتیاط برتیں اور ٹریفک ہدایات پر سختی سے عمل کریں۔

ابوظبی پولیس نے بھی دھند کے باعث ڈرائیورز کو محتاط رہنے کی ہدایت کی ہے اور متعدد اہم شاہراہوں پر اسپیڈ ریڈکشن سسٹم فعال کر دیا ہے، جن میں الطاف روڈ، ابوظبی۔العین روڈ اور دیگر مقامات شامل ہیں۔ این سی ایم نے جمعرات کی صبح بعض علاقوں میں دھند کے لیے سرخ اور پیلے الرٹ بھی جاری کیے۔

جمعرات کے موسم کے حوالے سے ملک میں مطلع جزوی طور پر ابر آلود رہے گا جبکہ مغربی علاقوں اور جزیروں پر کم اونچائی والے بادل بن سکتے ہیں۔ رات اور جمعے کی صبح کے درمیان ہلکی بارش کے امکانات ہیں۔

رات کے وقت ژالہ باری نہیں بلکہ نمی میں اضافہ متوقع ہے، جس کا اثر اندرونی علاقوں میں زیادہ محسوس ہوگا۔ ہوائیں جنوب مشرق سے شمال مغرب کی جانب 10 سے 20 کلومیٹر فی گھنٹہ کی رفتار سے چلیں گی، جو وقفے وقفے سے 30 کلومیٹر فی گھنٹہ تک پہنچ سکتی ہیں۔

دبئی میں جمعرات کو زیادہ سے زیادہ درجہ حرارت 29 ڈگری اور کم از کم 22 ڈگری رہنے کا امکان ہے جبکہ نمی 35 سے 85 فیصد کے درمیان رہے گی۔ ابوظبی میں درجہ حرارت 29 ڈگری زیادہ سے زیادہ اور 20 ڈگری کم سے کم رہے گا اور نمی کی شرح بھی 35 سے 85 فیصد کے درمیان ہوگی۔

بدھ کی صبح یو اے ای میں موسم قدرے سرد رہا، سب سے کم درجہ حرارت العین کے علاقے رکنہ میں 9 ڈگری ریکارڈ کیا گیا۔ گزشتہ چند دنوں سے اندرونی علاقوں میں درجہ حرارت 8 ڈگری سے بھی کم ہوتا رہا ہے، جس سے واضح ہے کہ ملک میں سردیوں کا باقاعدہ آغاز ہو چکا ہے۔

رہائشی اس موسم کو بھرپور انجوائے کر رہے ہیں اور صبح کی چہل قدمی، کیمپنگ اور آؤٹ ڈور سرگرمیوں کا رخ کر رہے ہیں۔ ٹھنڈے موسم نے شہریوں کو ایک خوشگوار تبدیلی کا احساس دلایا ہے۔