دبئی: مقامی میڈیا کے مطابق سعودی عرب کے سب سے عمر رسیدہ شخص ناصر بن ردان الرشید الوادعی 142 سال کی عمر میں انتقال کر گئے۔
ان کی نمازِ جنازہ جنوبی سعودی عرب کے علاقے ظہران الجنوب میں ادا کی گئی، جس کے بعد انہیں اپنے آبائی گاؤں الرشید میں سپردِ خاک کر دیا گیا۔ ان کے جنازے میں سات ہزار سے زائد افراد نے شرکت کی۔
وہ سعودی عرب کے قیام سے پہلے پیدا ہوئے تھے اور انہوں نے بانیِ مملکت شاہ عبدالعزیز سے لے کر موجودہ فرمانروا شاہ سلمان کے دور تک مملکت کی پوری تاریخ اپنی آنکھوں سے دیکھی۔ ان کی زندگی نے ملک کی سیاسی، سماجی اور معاشی تبدیلیوں کا طویل عرصہ دیکھا۔
خاندانی ذرائع کے مطابق انہوں نے 40 سے زائد مرتبہ حج ادا کیا اور مذہبی طور پر نہایت پابند اور متقی سمجھے جاتے تھے۔
ان کے پسماندگان میں 134 بچے اور پوتے نواسے شامل ہیں۔ بتایا جاتا ہے کہ انہوں نے آخری شادی 110 سال کی عمر میں کی اور بعد میں ایک بیٹی بھی پیدا ہوئی۔
ان کے انتقال کی خبر پر سوشل میڈیا پر بڑی تعداد میں تعزیتی پیغامات شیئر کیے گئے اور انہیں ایمان اور ثابت قدمی کی علامت قرار دیا گیا۔
