دبئی:
ڈسکوری گارڈنز میں جمعرات 15 جنوری سے باضابطہ طور پر بامعاوضہ پارکنگ کا آغاز کر دیا گیا ہے، جس کا مقصد پارکنگ اسپیس کے بہتر انتظام اور کمیونٹی میں ٹریفک دباؤ کو کم کرنا ہے۔ اس ضمن میں پارکونک (Parkonic) کی جانب سے مختلف پارکنگ زونز کے سائن بورڈ بھی نصب کر دیے گئے ہیں۔
نئے نظام کے تحت جن رہائشی عمارتوں میں پہلے سے پارکنگ کی سہولت موجود نہیں، وہاں ہر رہائشی یونٹ کو ایک مفت پارکنگ پرمٹ دیا جائے گا۔ تاہم اضافی گاڑیوں کے لیے ادا شدہ سبسکرپشن لینا لازم ہوگا۔
پارکونک کے مطابق:
-
ماہانہ پارکنگ ممبرشپ: 945 درہم
-
-
سہ ماہی ممبرشپ: 2,625 درہم
(سہ ماہی پیکج لینے پر ماہانہ ادائیگی کے مقابلے میں 210 درہم کی بچت ہوگی)
رہائشی اپنے مفت پارکنگ پرمٹ کو پارکونک ٹیننٹ رجسٹریشن پورٹل کے ذریعے فعال کر سکتے ہیں، جبکہ ادا شدہ سبسکرپشن پارکونک کی ویب سائٹ اور موبائل ایپ پر دستیاب ہے۔ کمیونٹی ڈیولپر نخیل نے بھی رہائشیوں کو ای میلز کے ذریعے پارکنگ کا بندوبست بروقت مکمل کرنے کی ہدایت کی ہے۔
فی گھنٹہ پارکنگ چارجز
-
صبح 8 بجے تا شام 5 بجے: 4 درہم فی گھنٹہ
-
شام 5 بجے تا رات 12 بجے: 6 درہم فی گھنٹہ
-
رات 12 بجے تا صبح 8 بجے: پارکنگ مفت
ڈسکوری گارڈنز کے ایک رہائشی (نام ظاہر نہ کرنے کی درخواست پر) نے بتایا کہ پارکنگ کے مسائل کے باعث اکثر فٹ پاتھ پر گاڑیاں کھڑی کرنا پڑتی تھیں، جس پر 500 درہم تک جرمانہ ہو جاتا تھا۔ ان کے مطابق اضافی گاڑیوں پر فیس عائد ہونے سے امید ہے کہ پارکنگ کی صورتحال بہتر ہو جائے گی۔
نوٹس کے مطابق مفت پرمٹ کے لیے درخواستیں 24 دسمبر 2025 سے شروع کی گئی تھیں، جبکہ ادا شدہ پرمٹس 9 جنوری سے دستیاب ہیں۔
اہم ہدایات
دبئی ہولڈنگ کمیونٹی مینجمنٹ نے واضح کیا ہے کہ:
-
ہر رہائشی یونٹ (جس کے پاس ذاتی پارکنگ نہیں) کو صرف ایک مفت پرمٹ ملے گا
-
ایک سے زائد گاڑی رکھنے والے مکینوں کو اضافی پارکنگ خریدنا ہوگی
-
پرمٹس رہائشی یونٹس کے نام پر جاری ہوں گے، افراد کے نام پر نہیں
حکام نے رہائشیوں کو ہدایت کی ہے کہ کسی بھی پریشانی سے بچنے کے لیے درخواستیں جلد مکمل کریں۔ ان کے مطابق یہ اقدام مشترکہ پارکنگ کے بہتر استعمال، سیکیورٹی میں بہتری اور رسائی آسان بنانے کی کوششوں کا حصہ ہے۔
