دبئی: دبئی کی روڈز اینڈ ٹرانسپورٹ اتھارٹی (آر ٹی اے) نے دبئی انٹرنیشنل ایئرپورٹ (ڈی ایکس بی) کے ٹرمینل 1 کی جانب جانے والے توسیع شدہ پل کو ٹریفک کے لیے کھول دیا ہے۔ آر ٹی اے نے ہفتے کے روز اس منصوبے کے افتتاح کا اعلان کیا۔
یہ منصوبہ دبئی ایوی ایشن انجینئرنگ پراجیکٹس کے اشتراک سے مکمل کیا گیا، جس کے تحت پل کو تین لین سے بڑھا کر چار لین کر دیا گیا ہے۔ توسیع کے بعد پل کی گنجائش 4,200 گاڑیوں فی گھنٹہ سے بڑھ کر 5,600 گاڑیوں فی گھنٹہ ہو گئی ہے، جو کہ 33 فیصد اضافہ ہے۔
آر ٹی اے کے مطابق اس اقدام سے ٹرمینل 1 کی جانب جانے والی ٹریفک کے بہاؤ میں نمایاں بہتری آئے گی اور خاص طور پر مصروف اوقات میں ٹریفک کی بھیڑ میں کمی متوقع ہے۔
اتھارٹی کا کہنا ہے کہ یہ منصوبہ دبئی کے سڑکوں کے بنیادی ڈھانچے کو بہتر بنانے اور دنیا کے مصروف ترین ہوائی اڈوں میں شامل دبئی انٹرنیشنل ایئرپورٹ پر مسافروں کی بڑھتی ہوئی تعداد کو سہولت فراہم کرنے کی جاری کوششوں کا حصہ ہے۔
