خلیج اردو
دبئی پولیس نے عوامی پارکنگ ایریا سے ملنے والی 2 لاکھ درہم کی خطیر رقم ایمانداری سے واپس کرنے پر ایک غیر ملکی شہری کو اعزاز سے نوازا۔ پولیس کے مطابق یہ واقعہ 3 فروری کو پیش آیا۔
اعزاز پانے والے شہری محمد سلیمان القریوطی، جو اردن کے شہری ہیں، نے پولیس اسٹیشن کے دائرہ اختیار میں واقع ایک عوامی پارکنگ ایریا سے نقد رقم برآمد کی اور فوری طور پر دبئی پولیس کے حوالے کر دی۔
اعزاز وصول کرتے ہوئے محمد سلیمان القریوطی نے کہا کہ انہوں نے یہ اقدام کسی تعریف یا صلے کی نیت سے نہیں بلکہ اخلاقی فرض سمجھ کر کیا۔
بردبئی پولیس اسٹیشن کے ڈائریکٹر بریگیڈیئر خلیفہ خالد العوضی نے القریوطی کی دیانتداری کو معاشرے میں رائج اعلیٰ اخلاقی اقدار کی عکاس قرار دیا۔
واضح رہے کہ گزشتہ ماہ بھی دبئی میونسپلٹی کے ایک ملازم کو حتیٰ پولیس اسٹیشن نے ایک سیاح کا اہم دستاویزات پر مشتمل بیگ ایمانداری سے واپس کرنے پر اعزاز سے نوازا تھا، جس میں پاسپورٹ سمیت دیگر اہم کاغذات شامل تھے۔
سیاح نے اپنا سامان واپس ملنے پر خوشی کا اظہار کرتے ہوئے متحدہ عرب امارات میں اعلیٰ سطح کے امن و امان اور تحفظ کو سراہا۔
