شیخ حمدان نے میوزیم آف دی فیوچر میں ’لائف اینڈ بایوڈائیورسٹی لیبارٹری‘ کا اعلان کر دیا

خلیج اردو
دبئی کے ولی عہد شیخ حمدان بن محمد بن راشد المکتوم نے میوزیم آف دی فیوچر میں ایک نئی سائنسی لیبارٹری کے قیام کا اعلان کر دیا ہے۔ یہ اعلان انہوں نے ورلڈ گورنمنٹس سمٹ 2026 کے دوران سوشل میڈیا پر کیا۔

شیخ حمدان کے مطابق ’لائف اینڈ بایوڈائیورسٹی لیبارٹری‘ ایک جدید اور منفرد سائنسی تجربہ ہوگی، جسے امریکی ادارے کولوسل فاؤنڈیشن کے اشتراک سے قائم کیا گیا ہے۔ لیبارٹری کو میوزیم آف دی فیوچر میں مستقل طور پر رکھا گیا ہے تاکہ یہ عوام کے لیے ہمہ وقت قابلِ رسائی رہے۔

انہوں نے کہا کہ اس لیبارٹری کا مقصد ایسی جدید اختراعات کو پیش کرنا ہے جو قدرتی دنیا کے بارے میں ہماری سمجھ کو وسعت دیں اور ناپید ہوتی انواع کے تحفظ کے لیے عالمی کوششوں کی حمایت کریں۔

شیخ حمدان نے وژن کی وضاحت کرتے ہوئے کہا کہ اس اقدام کا مقصد آگاہی اور شعور پیدا کرنا ہے تاکہ ایک روشن اور پائیدار مستقبل کی راہ ہموار کی جا سکے۔

شیخ حمدان کی جانب سے شیئر کی گئی تصاویر کے مطابق لیبارٹری میں حیاتیاتی تنوع کو اجاگر کیا جائے گا، جن میں تسمانیائی ٹائیگر کا ڈھانچہ، وولی میمتھ کی ہڈیاں اور دیگر محفوظ شدہ نایاب انواع شامل ہیں، جو معدوم جانوروں کے مطالعے اور ممکنہ بحالی کی کوششوں کی عکاسی کرتی ہیں۔