خلیج اردو
دبئی ہلز کے ایک مال میں دو چھ سالہ بچیاں گم ہو گئیں، جنہیں ایک برازیلین جوڑے نے بروقت پہچان کر والدین سے ملا دیا۔ دبئی پولیس نے تصدیق کی ہے کہ دونوں بچیاں محفوظ ہیں اور وہ اپنی رہائشی آبادی سے خود نکل گئی تھیں۔
واقعہ 4 فروری کی شام پیش آیا، جب مقامی رہائشی اوتاویو سوکول اور ان کی اہلیہ گیبریئیلا خریداری کے لیے مال میں موجود تھے۔ اسٹور میں دو کم عمر بچیاں اکیلی اور پریشان دکھائی دیں، جو کاؤنٹر کے قریب فرش پر بکھرے پیسے گن رہی تھیں۔
اوتاویو سوکول نے بتایا، "میں نے والدین کے واٹس ایپ گروپ میں لاپتا بچوں کی تصویر دیکھی، پھر سامنے کھڑی بچی کو دیکھا تو فوراً پہچان ہوگئی کہ یہی وہی بچیاں ہیں۔”
جوڑے نے فوری طور پر اسٹور انتظامیہ اور مال مینجمنٹ کو اطلاع دی اور پولیس کو بلایا۔ اسٹاف کے مطابق بچیاں دو گھنٹے سے اسٹور میں تھیں اور ٹینٹ سمیت سامان دیکھ رہی تھیں، جیسے باہر سونے کی تیاری ہو۔
گیبریئیلا نے بچیوں کو پرسکون کیا، جبکہ ایک مختصر ویڈیو بنا کر والدین کو بھیجی گئی تاکہ انہیں تسلی دی جا سکے۔ بعد ازاں پولیس کی آمد پر تصدیق کے بعد بچیاں والدین کے حوالے کر دی گئیں۔
اوتاویو سوکول کا کہنا تھا، "بچے کا کھو جانا والدین کے لیے قیامت سے کم نہیں۔ یہ تجربہ انسان کو عاجز کر دیتا ہے اور زندگی کو نئے زاویے سے دیکھنے پر مجبور کرتا ہے۔”
انہوں نے دبئی کی کمیونٹی اور سکیورٹی نیٹ ورک کو سراہتے ہوئے کہا، "یہ شہر محفوظ ہے اور یہاں لوگ ایک دوسرے کا خیال رکھتے ہیں، یہی چیز اسے خاص بناتی ہے۔
