خلیج اردو
متحدہ عرب امارات میں رمضان المبارک کے دوران کئی اسکولوں کی جانب سے جمعہ کے روز طلبہ کو آن لائن تعلیم کا آپشن دینے کے فیصلے کو والدین نے سراہا ہے، جس سے روزہ رکھنے والے خاندانوں کو معمولات میں توازن قائم رکھنے میں مدد ملی ہے۔
Dubai کی رہائشی مہناز کے مطابق، "یہ بہترین فیصلہ تھا جس سے صبح کا وقت نہایت پُرسکون گزرا۔ جمعہ کی نماز اور رمضان کے شیڈول کے باعث مختصر تعلیمی دن کے لیے اسکول جانا اور ٹریفک میں وقت گزارنا مشکل ہو جاتا ہے۔”
انہوں نے بتایا کہ ان کے Year 12 اور Year 7 میں زیر تعلیم بچوں کو آن لائن کلاسز کے بجائے اسائنمنٹس دی گئیں، جنہیں مکمل کر کے سبجیکٹ ٹیمز پر اپ لوڈ کرنا لازمی تھا تاکہ حاضری یقینی بنائی جا سکے۔ "بچوں کو سحری کے بعد آرام کا بھی موقع ملا اور تعلیم بھی جاری رہی۔”
ایک اور والدہ کیٹ جوزف نے کہا کہ انہیں گزشتہ ہفتے اسکول کی جانب سے سوالنامہ موصول ہوا تھا جس میں جمعہ کے روز آن لائن تعلیم کے انتخاب کے بارے میں پوچھا گیا۔ "اگرچہ میں روزہ نہیں رکھ رہی، لیکن جانتی ہوں کہ روزہ دار دوستوں کے لیے یہ بڑی سہولت ہے، اسی لیے ہم نے آن لائن آپشن منتخب کیا۔”
دوسری جانب دبئی کی رہائشی شبنا ابراہیم نے بتایا کہ ان کے ایک بچے کو آن لائن کلاس کا اختیار دیا گیا جبکہ کم عمر بچی کو اسکول جانا پڑا۔ "ہم نے فیصلہ کیا کہ پانچ سالہ بچی کے لیے صرف مختصر وقت کے لیے اسکول جانا مناسب نہیں، اس لیے اسے گھر پر ہی رکھا۔ اس سے سحری کے بعد مزید آرام کا موقع ملا۔”
جن خاندانوں کو آن لائن کلاس کا اختیار نہیں ملا، انہوں نے بھی مثبت اثرات محسوس کیے۔ میرڈف سے تعلق رکھنے والی طیبہ انور کے مطابق، "آج ٹریفک معمول سے کہیں کم تھا۔ عام طور پر اسکول پہنچنے میں 25 منٹ لگتے ہیں مگر آج صرف 12 سے 15 منٹ میں سفر مکمل ہوگیا۔”
والدین کے مطابق رمضان میں یہ لچکدار جمعہ نہ صرف ٹریفک سے بچاؤ کا ذریعہ بنا بلکہ عبادات، تعلیم اور خاندانی وقت میں توازن پیدا کرنے میں بھی مددگار ثابت ہوا، جو تعلیمی اداروں کی حساس پالیسی سازی کی عکاسی کرتا ہے۔
