خلیج اردو
دبئی میں رمضان المبارک کے دوران شہر کی مختلف مساجد اور عوامی مقامات خصوصی روشنیوں سے جگمگا اٹھے ہیں، جہاں افطار کے بعد شہریوں اور نمازیوں کیلئے روح پرور مناظر پیش کیے جا رہے ہیں۔ "رمضان ریفلیکشنز (اطیاف رمضانیہ)” کے عنوان سے جاری اس اقدام کے تحت اسلامی طرزِ تعمیر، خطاطی اور رنگوں کے حسین امتزاج سے مساجد کے بیرونی حصوں کو روشن کیا جا رہا ہے۔
یہ خصوصی لائٹنگ انسٹالیشنز 22 مارچ تک روزانہ شام 7 بجے سے رات 2 بجے تک دیکھی جا سکتی ہیں۔ اس منصوبے میں دبئی کی آٹھ مساجد اور اطراف کے اہم مقامات شامل ہیں جہاں کچھ مساجد پر 360 ڈگری پروجیکشنز کے ذریعے گنبدوں اور میناروں کو مکمل طور پر روشن کیا گیا ہے جبکہ بعض مقامات پر مخصوص اطراف پر روشنیوں کا اہتمام کیا گیا ہے۔
روشن ہونے والی مساجد میں Jumeirah Mosque، Zabeel Mosque، Al Hudaiba Mosque، Al Habai Mosque، Sheikh Rashid Al Maktoum Mosque، Al Rashidiya Mosque، Dubai Harbour Mosque اور Musabah Bin Rashid Al Fattan Mosque شامل ہیں۔
اس کے علاوہ Al Seef اور Dubai Festival City Mall میں بھی عوامی مقامات اور عمارتوں پر روشنیوں کی نمائش کی جا رہی ہے، جس سے پورا علاقہ ایک روحانی اور دیدہ زیب ماحول پیش کر رہا ہے۔
انتظامیہ کے مطابق یہ لائٹنگ ڈسپلے خاص طور پر ان اوقات میں ترتیب دیے گئے ہیں جب رمضان کی راتوں میں شہری سرگرمیاں عروج پر ہوتی ہیں، تاکہ خاندان، نمازی اور فوٹوگرافی کے شوقین افراد ان مناظر سے لطف اندوز ہو سکیں۔ تجزیہ کاروں کے مطابق اس اقدام سے نہ صرف مذہبی ماحول کو اجاگر کیا جا رہا ہے بلکہ شہریوں کیلئے ایک مثبت اور پُرسکون تجربہ بھی فراہم کیا جا رہا ہے۔
