خلیج اردو
فجیرہ میں حکام نے ایک عرب شہری کو حساس مقامات میں غیر قانونی داخلے اور بغیر اجازت فلم بندی کرنے پر گرفتار کر لیا ہے۔ ملزم خفیہ طور پر ممنوعہ علاقوں میں داخل ہوا اور وہاں ویڈیو ریکارڈنگ کرتا رہا، جس پر اسے حراست میں لیا گیا۔
تحقیقات کے دوران انکشاف ہوا کہ ملزم ایک میڈیا ادارے سے وابستہ ہے، تاہم اسے ان مقامات تک رسائی یا فلم بندی کی کوئی باضابطہ اجازت حاصل نہیں تھی۔ مزید معلوم ہوا کہ وہ ایک صحافی کی کرائے کی گاڑی استعمال کرتے ہوئے ان علاقوں میں داخل ہوا۔
حکام کے مطابق ریکارڈ کی گئی ویڈیوز بغیر اجازت لندن میں قائم ایک خبر رساں ادارے کو بھیجی گئیں، جو کمپنی کی علاقائی ہدایات کے تحت کیا گیا اقدام تھا۔
ملزم کو پبلک پراسیکیوشن کے حوالے کر دیا گیا ہے تاکہ اس کے خلاف غیر قانونی داخلے اور بغیر لائسنس فلم بندی کے الزامات پر قانونی کارروائی کی جا سکے۔
حکام نے واضح کیا کہ اماراتی قوانین کے تحت ممنوعہ علاقوں میں بغیر اجازت داخل ہونا یا وہاں کسی بھی قسم کی تصویر، ویڈیو یا معلومات ریکارڈ کرنا جرم ہے، اور اس کے لیے پیشگی سرکاری اجازت لازمی ہے۔
تجزیہ کاروں کے مطابق یہ کارروائی ملک میں سکیورٹی اور نظم و ضبط برقرار رکھنے کے لیے قوانین کے سخت نفاذ کی عکاسی کرتی ہے۔
