خلیج اردو
علاقائی کشیدگی کے باوجود دبئی میں معمولات زندگی جاری ہیں، جہاں سیاحوں اور رہائشیوں نے شہر میں سست روی کے تاثر کو مسترد کر دیا ہے۔
بھارت سے آنے والے سرمایہ کار ورندر بنسل نے بتایا کہ ان کی پرواز مکمل بھری ہوئی تھی، جو اس بات کا ثبوت ہے کہ دبئی آنے والوں کی تعداد میں کوئی بڑی کمی نہیں آئی۔
انہوں نے کہا کہ اگرچہ شہر کچھ حد تک پرسکون محسوس ہوتا ہے، تاہم مالز، ریسٹورنٹس اور دیگر عوامی مقامات مکمل طور پر فعال ہیں اور کہیں بھی گھبراہٹ کا ماحول نہیں۔
مال آف دی ایمریٹس کے دورے کے دوران بھی یہی منظر دیکھنے میں آیا، جہاں دکانیں کھلی تھیں، ریسٹورنٹس مصروف تھے اور روزمرہ کی سرگرمیاں جاری تھیں، اگرچہ رش معمول سے کچھ کم تھا۔
شہر کے کچھ علاقوں جیسے ایئرپورٹ کے قریب مِردف میں ابتدائی دنوں میں معمولی خلل دیکھا گیا، تاہم ڈاؤن ٹاؤن دبئی اور شیخ زاید روڈ جیسے علاقوں میں صورتحال زیادہ متاثر نہیں ہوئی۔
کاروباری افراد بھی پراعتماد دکھائی دے رہے ہیں، بنگلور سے آنے والے ڈیزائنر سعید میران نے کہا کہ "کاروبار جاری ہے، صرف توجہ زیادہ مرکوز ہو گئی ہے”، جبکہ ایک اور تاجر احمد اکرم نے بھی شہر میں معمول کی سرگرمیوں کی تصدیق کی۔
ماہرین کے مطابق اگرچہ مہنگے رئیل اسٹیٹ سیکٹر میں کچھ کمی دیکھی جا رہی ہے، تاہم درمیانی سطح کی پراپرٹی مارکیٹ اب بھی مستحکم ہے اور خریدار محتاط انداز میں فیصلے کر رہے ہیں۔
تجزیہ کاروں کے مطابق دبئی میں جاری معمولات زندگی اس بات کی عکاسی کرتے ہیں کہ شہر نہ صرف مستحکم ہے بلکہ عالمی کشیدگی کے باوجود اپنی معاشی سرگرمیاں برقرار رکھنے کی صلاحیت رکھتا ہے۔
