خلیج اردو
متحدہ عرب امارات کی بڑی فضائی کمپنیوں امارات ایئرلائن، اتحاد ایئرویز، فلائی دبئی اور ایئر عربیہ نے خطے میں جاری کشیدگی اور فضائی حدود کی پابندیوں کے باوجود اپنی پروازوں کا دائرہ 250 سے زائد عالمی مقامات تک بڑھا دیا ہے۔
یہ ایئرلائنز افریقہ، یورپ، ایشیا، مشرق وسطیٰ، امریکا اور آسٹریلیا سمیت تقریباً تمام براعظموں میں اہم شہروں کو آپس میں جوڑ رہی ہیں، جس سے مسافروں کو وسیع سفری سہولت میسر ہے۔
اتحاد ایئرویز اس وقت 40 سے زائد ممالک میں 100 سے زیادہ مقامات پر پروازیں چلا رہی ہے، جن میں اسلام آباد، کراچی، لندن، نیویارک اور سڈنی شامل ہیں، جبکہ نئی منزلوں میں کیلگری، دمشق اور لکسمبرگ بھی شامل کیے گئے ہیں۔
دوسری جانب امارات ایئرلائن تقریباً 140 عالمی شہروں تک پروازیں چلا رہی ہے، جن میں لاہور، ممبئی، پیرس، ٹورنٹو اور سڈنی جیسے بڑے شہر شامل ہیں۔
کم لاگت والی ایئرلائن فلائی دبئی مشرق وسطیٰ، وسطی ایشیا اور یورپ کے درجنوں شہروں کے ساتھ ساتھ پاکستان کے کراچی، ملتان اور سیالکوٹ تک بھی پروازیں فراہم کر رہی ہے۔
اسی طرح ایئر عربیہ نے بھی اپنے نیٹ ورک کو وسعت دیتے ہوئے جنوبی ایشیا، یورپ اور افریقہ کے کئی اہم شہروں کو شامل کر لیا ہے، جن میں لاہور، ڈھاکہ اور استنبول شامل ہیں۔
رپورٹ کے مطابق پروازوں کے اوقات کار موسم، طلب اور موجودہ حالات کے مطابق تبدیل ہو سکتے ہیں، اس لیے مسافروں کو ہدایت دی گئی ہے کہ وہ سفر سے پہلے متعلقہ ایئرلائن کی ویب سائٹ سے تازہ ترین معلومات ضرور حاصل کریں۔
تجزیہ کاروں کا کہنا ہے کہ موجودہ علاقائی کشیدگی کے باوجود یو اے ای کی فضائی صنعت کی بحالی اور توسیع عالمی سفری نظام میں اس کے مضبوط کردار کی عکاسی کرتی ہے۔
