یو اے ای نے ایران سے آنے والے نئے میزائل اور ڈرون حملے ناکام بنا دیے، شہریوں کو گھروں میں رہنے کی ہدایت

خلیج اردو
دبئی: یو اے ای حکام نے تصدیق کی ہے کہ ملک کے فضائی دفاعی نظام ایران کی جانب سے داغے گئے میزائلوں اور ڈرونز کو مسلسل ناکام بنا رہے ہیں، جبکہ خطے میں کشیدگی میں اضافہ ہو رہا ہے۔ وزارت دفاع کے مطابق مختلف علاقوں میں سنائی دینے والی آوازیں دراصل دفاعی نظام کی کارروائی کا نتیجہ ہیں، نہ کہ کسی حملے کے زمین پر گرنے کی۔

وزارت داخلہ اور نیشنل ایمرجنسی کرائسز اینڈ ڈیزاسٹر مینجمنٹ اتھارٹی نے عوام کو ہدایت کی ہے کہ وہ گھروں یا محفوظ مقامات پر رہیں اور صرف سرکاری ذرائع سے معلومات حاصل کریں۔ حکام کا کہنا ہے کہ تمام دفاعی نظام مکمل طور پر فعال ہیں اور شہریوں کی حفاظت اولین ترجیح ہے۔

شہریوں کو ہدایت دی گئی ہے کہ ایمرجنسی کے دوران ویڈیوز بنانے یا سوشل میڈیا پر شیئر کرنے سے گریز کریں، گاڑی چلاتے ہوئے سڑک پر نہ رکیں بلکہ محفوظ مقام تک پہنچیں، اور صرف حقیقی ایمرجنسی میں 999 پر رابطہ کریں۔

حکام کے مطابق صورتحال پر مسلسل نظر رکھی جا رہی ہے اور مزید اپ ڈیٹس جاری کی جا سکتی ہیں، جبکہ افواہوں سے بچنے اور ذمہ داری کا مظاہرہ کرنے پر زور دیا گیا ہے۔