خلیج اردو
متحدہ عرب امارات کے دارالحکومت ابوظہبی میں دو خطرناک ٹریفک حادثات پیش آئے، جن کی بنیادی وجہ غیر محفوظ انداز میں سڑک پر داخل ہونا اور دورانِ ڈرائیونگ توجہ کی کمی قرار دی گئی ہے۔
ابوظہبی پولیس نے ان حادثات کی ویڈیو جاری کرتے ہوئے ڈرائیورز کو خبردار کیا ہے کہ وہ سڑک پر داخل ہونے سے پہلے مکمل طور پر راستہ صاف ہونے کی یقین دہانی کریں اور کسی بھی قسم کی توجہ ہٹانے والی سرگرمی سے گریز کریں۔
پہلے واقعے میں ایک سفید کار کے ڈرائیور نے اچانک سڑک پر داخل ہوتے ہوئے پیچھے سے آنے والی تیز رفتار گاڑی کو نظر انداز کیا، جس کے نتیجے میں شدید تصادم ہوا۔ متاثرہ گاڑی بے قابو ہو کر دوسری گاڑی سے بھی ٹکرا گئی اور ٹریفک مکمل طور پر رک گئی۔
دوسرے حادثے میں ایک ڈرائیور کی غفلت کے باعث گاڑی الٹ گئی اور سڑک کے کنارے رکاوٹ سے جا ٹکرائی، حالانکہ اس نے لین تبدیل کرنے کیلئے اشارہ دیا تھا، تاہم توجہ کی کمی حادثے کا سبب بنی۔
حکام کے مطابق سڑک پر بغیر تصدیق داخل ہونے پر 400 درہم جرمانہ اور چار بلیک پوائنٹس جبکہ غفلت آمیز ڈرائیونگ پر 800 درہم جرمانہ اور چار بلیک پوائنٹس مقرر ہیں۔
یہ ویڈیوز ٹریفک آگاہی مہم کا حصہ ہیں جن کا مقصد شہریوں کو محتاط ڈرائیونگ کی اہمیت سے آگاہ کرنا اور حادثات کی شرح میں کمی لانا ہے۔
یہ واقعات اس امر کی نشاندہی کرتے ہیں کہ معمولی غفلت بھی سنگین حادثات کا سبب بن سکتی ہے، اس لیے ڈرائیورز کو ہر حال میں احتیاط کو ترجیح دینا ہوگی۔
