خلیج اردو
Dubai Police کے مطابق دبئی کے القصیص صنعتی علاقے میں ایک افسوسناک حادثے کے دوران ریکوری ٹرک ڈرائیور اس وقت جان کی بازی ہار گیا جب گاڑی اتارتے ہوئے اچانک اس پر آ گری۔
پولیس کے مطابق حادثے کی اطلاع جنرل ڈیپارٹمنٹ آف آپریشنز کے کمانڈ اینڈ کنٹرول سینٹر کو موصول ہوئی جس کے بعد امدادی اور ریسکیو ٹیمیں فوری طور پر موقع پر پہنچیں، تاہم ڈرائیور موقع پر ہی دم توڑ چکا تھا۔
جنرل ڈیپارٹمنٹ آف ٹریفک کے ڈائریکٹر بریگیڈیئر جمعہ سالم بن سویدان نے بتایا کہ ابتدائی تحقیقات سے معلوم ہوا کہ غفلت، حفاظتی اصولوں پر عمل نہ کرنے اور کرین آپریٹ کرتے وقت غلط اندازے کے باعث گاڑی اچانک نیچے آ گری اور ڈرائیور اس کی زد میں آ گیا۔
پولیس حکام کے مطابق ٹریفک ماہرین اور گشت کرنے والی ٹیموں نے موقع پر پہنچ کر شواہد اکٹھے کیے جبکہ ٹریفک کی روانی برقرار رکھنے کیلئے علاقے کو محفوظ بنایا گیا تاکہ مزید حادثات سے بچا جا سکے۔
بریگیڈیئر جمعہ سالم بن سویدان نے کہا کہ یہ واقعہ اس بات کی سنگین مثال ہے کہ تعمیراتی مقامات اور سڑکوں پر لوڈنگ اور اَن لوڈنگ کے دوران حفاظتی تدابیر میں غفلت کتنی خطرناک ثابت ہو سکتی ہے۔ انہوں نے تمام ریکوری ٹرک ڈرائیوروں اور متعلقہ کارکنوں پر زور دیا کہ وہ پیشہ ورانہ حفاظتی اصولوں پر مکمل عمل کریں۔
دبئی پولیس نے کہا کہ مختلف شعبوں کے ڈرائیوروں اور کارکنوں میں آگاہی پیدا کرنے کیلئے خصوصی مہمات جاری ہیں جبکہ جدید اسمارٹ نظام اور ٹیکنالوجی کے ذریعے خطرناک رویوں کی نگرانی بھی کی جا رہی ہے تاکہ انسانی جانوں اور املاک کا تحفظ یقینی بنایا جا سکے۔
یہ حادثہ ایک بار پھر اس حقیقت کو اجاگر کرتا ہے کہ معمولی غفلت بھی بھاری مشینری کے استعمال کے دوران جان لیوا ثابت ہو سکتی ہے۔
