ابوظبی میں کرایوں پر عارضی پابندی کے بعد توثیق نظام اہمیت اختیار کر گیا، رجسٹریشن، فیس اور فوائد کی مکمل تفصیلات سامنے آگئیں

خلیج اردو
ابوظبی میں کرایوں میں اضافے پر عارضی پابندی کے اعلان کے بعد "توثیق” نظام ایک بار پھر توجہ کا مرکز بن گیا ہے۔ رہائشی، تجارتی اور صنعتی تمام کرایہ داری معاہدے اسی نظام کے تحت رجسٹر ہوتے ہیں اور حالیہ فیصلے کے مطابق انہی رجسٹرڈ جائیدادوں پر کرایوں میں اضافے سے استثنیٰ لاگو ہوگا۔

توثیق ایک قانونی کرایہ داری نظام ہے جس کا مقصد ابوظبی میں تمام کرایہ داری معاہدوں کا سرکاری ریکارڈ محفوظ رکھنا اور کرایہ داروں و مالکان کے حقوق کا تحفظ یقینی بنانا ہے۔ اس نظام کے تحت رجسٹرڈ معاہدے قانونی حیثیت رکھتے ہیں اور کسی بھی تنازعے کی صورت میں قابلِ عمل تصور کیے جاتے ہیں۔

توثیق رجسٹریشن صرف کرایہ داری معاہدے تک محدود نہیں بلکہ جائیداد سے متعلق مختلف سرکاری معاملات، پانی اور بجلی جیسی سہولیات کے حصول کے لیے بھی ضروری ہے۔ محکمہ بلدیات و ٹرانسپورٹ کے مطابق جائیداد کی رجسٹریشن کی ذمہ داری مالک یا اس کی جانب سے مقرر کردہ انتظامی کمپنی پر عائد ہوتی ہے۔

رجسٹریشن کے لیے مالک یا اس کا مجاز نمائندہ پہلے محکمہ بلدیات و ٹرانسپورٹ کی ویب سائٹ پر اکاؤنٹ بناتا ہے۔ بعد ازاں اسمارٹ ہب پلیٹ فارم پر جائیداد اور کرایہ داری معاہدے کی معلومات درج کرکے درخواست مکمل کی جاتی ہے۔ عام طور پر معاہدے کی جانچ اور منظوری کا عمل چند منٹ میں مکمل ہو جاتا ہے۔

فیس کے حوالے سے ہر جائیداد کی رجسٹریشن پر 900 درہم جبکہ ہر یونٹ پر 5 درہم فیس مقرر ہے۔ کرایہ داری معاہدے کے اندراج اور سالانہ تجدید کی فیس 50 درہم ہے، جو مالک ادا کرتا ہے۔ معاہدے میں ترمیم یا قبل از وقت منسوخی پر کوئی اضافی فیس نہیں لی جاتی۔

رجسٹریشن کے لیے درکار دستاویزات میں ملازمت کا معاہدہ، پاور آف اٹارنی، کمپنی کے قیام کا معاہدہ اور دستخط شدہ کمپنی یوزر اقرار نامہ شامل ہیں۔ رجسٹرڈ توثیق معاہدے کا ابوظبی محکمہ توانائی کے پانی اور بجلی کے نظام سے منسلک ہونا بھی ضروری ہے۔