شارجہ میں سوشل میڈیا تنازع خونریز جھگڑے میں بدل گیا، قتل میں ملوث افراد چار گھنٹوں میں گرفتار

خلیج اردو
شارجہ پولیس نے سوشل میڈیا پر شروع ہونے والے تنازع کے نتیجے میں پیش آنے والے قتل کے واقعے کی تفصیلات جاری کرتے ہوئے بتایا ہے کہ جھگڑے میں ملوث تمام افراد کو واقعے کے چند گھنٹوں کے اندر گرفتار کر لیا گیا ہے۔

پولیس کے مطابق اطلاع موصول ہوئی تھی کہ شارجہ کے ایک شاپنگ مال کے سامنے متعدد ایشیائی افراد کے درمیان شدید جھگڑا ہوا ہے۔ اس دوران تیز دھار آلے کے استعمال سے دو افراد زخمی ہو گئے۔

اطلاع ملتے ہی پولیس اور متعلقہ ٹیمیں موقع پر پہنچ گئیں اور زخمیوں کو فوری طور پر اسپتال منتقل کیا گیا، تاہم ان میں سے ایک شخص زخموں کی تاب نہ لاتے ہوئے جان کی بازی ہار گیا جبکہ دوسرا زیر علاج ہے۔

پولیس نے مقتول اور زخمی کی شناخت ظاہر نہیں کی، تاہم بتایا کہ دونوں ایک ہی قومیت سے تعلق رکھتے ہیں۔

ابتدائی تحقیقات کے مطابق تنازع کا آغاز سوشل میڈیا پر ہوا تھا، جو بعد ازاں براہِ راست ملاقات اور تصادم کی صورت اختیار کر گیا۔ جھگڑے کے دوران ایک ملزم نے تیز دھار ہتھیار استعمال کیا جس کے نتیجے میں یہ افسوسناک واقعہ پیش آیا۔

شارجہ پولیس نے بتایا کہ خصوصی تفتیشی ٹیموں نے رپورٹ موصول ہونے کے صرف چار گھنٹوں کے اندر سرچ آپریشن اور تحقیقات کے ذریعے تمام ملوث افراد کو گرفتار کر لیا۔ ملزمان کے خلاف قانونی کارروائی شروع کر دی گئی ہے۔

پولیس نے اس بات پر زور دیا کہ سوشل میڈیا پر پیدا ہونے والے اختلافات اور تنازعات کو ذاتی تصادم یا تشدد کے ذریعے حل کرنے کے بجائے قانونی ذرائع سے نمٹایا جانا چاہیے۔

حکام نے شہریوں اور رہائشیوں کو خبردار کیا کہ اشتعال انگیز رویوں، دھمکیوں اور تصادم کی دعوت دینے والے پیغامات سے گریز کریں، کیونکہ ایسے اقدامات عوامی سلامتی کے لیے خطرہ بن سکتے ہیں اور قانون کے تحت سخت کارروائی کا باعث بنتے ہیں۔

شارجہ پولیس نے عوام سے اپیل کی ہے کہ ڈیجیٹل پلیٹ فارمز کا ذمہ دارانہ استعمال کریں اور کسی بھی قسم کے پرتشدد یا اشتعال انگیز رویے کی اطلاع ہیلپ لائن 901 پر دیں۔

یہ واقعہ ایک بار پھر اس حقیقت کو اجاگر کرتا ہے کہ سوشل میڈیا پر ہونے والے تنازعات اگر بروقت اور قانونی طریقے سے حل نہ کیے جائیں تو وہ حقیقی زندگی میں سنگین اور جان لیوا نتائج کا سبب بن سکتے ہیں۔