خلیج اردو
متحدہ عرب امارات میں محکمہ موسمیات نے پیر 15 جون کی صبح ملک کے مختلف علاقوں میں شدید دھند کے باعث ریڈ اور ییلو الرٹ جاری کر دیا ہے، جس کے تحت خصوصاً مغربی ساحلی علاقوں میں حدِ نگاہ میں نمایاں کمی کا خدشہ ظاہر کیا گیا ہے۔
نیشنل سینٹر آف میٹرولوجی (NCM) کے مطابق دھند کے باعث صبح 9 بجے تک ڈرائیورز کو انتہائی احتیاط برتنے کی ہدایت کی گئی ہے، جبکہ ابوظہبی پولیس نے شہریوں سے کہا ہے کہ وہ سڑکوں پر گاڑی چلاتے وقت رفتار کم رکھیں اور محفوظ فاصلہ برقرار رکھیں۔
نیشنل سینٹر آف میٹرولوجی نے خبردار کیا ہے کہ دھند کے دوران حدِ نگاہ خطرناک حد تک کم ہو سکتی ہے، جس سے ٹریفک حادثات کا خطرہ بڑھ جاتا ہے۔
محکمہ موسمیات کے مطابق ملک بھر میں درجہ حرارت میں اضافہ متوقع ہے، بعض علاقوں میں پارہ 48 ڈگری سینٹی گریڈ تک جا سکتا ہے، جن میں ابوظہبی کا علاقہ غیسورہ بھی شامل ہے۔
دبئی اور ابوظہبی میں زیادہ سے زیادہ درجہ حرارت 43 ڈگری سینٹی گریڈ جبکہ کم از کم درجہ حرارت بالترتیب 30 اور 29 ڈگری رہنے کی توقع ہے۔
ہوائیں جنوب مغرب سے شمال مغرب کی سمت میں ہلکی سے معتدل رفتار سے چلیں گی، جبکہ بعض اوقات سمندری علاقوں میں ان کی شدت بڑھ سکتی ہے۔ ہوا کی رفتار 10 سے 25 کلومیٹر فی گھنٹہ جبکہ جھکڑ 40 کلومیٹر فی گھنٹہ تک پہنچ سکتے ہیں۔
سمندر کی صورتحال کے حوالے سے بتایا گیا ہے کہ خلیج عرب میں پانی کی سطح رات کے وقت معتدل سے شدید ہو سکتی ہے، جبکہ بحیرہ عمان میں صورتحال نسبتاً پرسکون رہے گی۔
ماہرین نے شہریوں کو ہدایت دی ہے کہ شدید گرمی اور دھند دونوں موسمی حالات میں احتیاطی تدابیر اختیار کریں، غیر ضروری سفر سے گریز کریں اور پانی کا زیادہ استعمال کریں۔
