خلیج اردو
قطر کے رأس لفان انڈسٹریل سٹی میں واقع گیس تنصیب میں پیش آنے والے دھماکے میں 13 کارکن جاں بحق اور 66 زخمی ہوگئے، جبکہ جاں بحق افراد میں 12 بھارتی اور ایک پاکستانی شہری شامل ہیں۔
بھارتی سفارت خانے نے تصدیق کی ہے کہ دھماکے میں 12 بھارتی شہری جان کی بازی ہار گئے۔ سفارت خانے نے متاثرہ خاندانوں سے تعزیت کا اظہار کرتے ہوئے کہا ہے کہ زخمی ہونے والے تمام افراد کی حالت مستحکم ہے اور انہیں مناسب طبی سہولیات فراہم کی جا رہی ہیں۔
قطر کے وزیرِ توانائی سعد الکعبی کے مطابق یہ دھماکہ رأس لفان کمپلیکس میں آپریشنز کی بحالی کے دوران پیش آیا۔ انہوں نے بتایا کہ حادثے میں 13 افراد جاں بحق اور 66 زخمی ہوئے جبکہ ابتدائی تحقیقات کے مطابق یہ ایک آپریشنل حادثہ تھا، تخریب کاری یا بیرونی حملے کا نتیجہ نہیں۔
قطر انرجی نے اپنے بیان میں کہا کہ دھماکہ بارزان گیس سپلائی تنصیب میں آپریشنز کے آغاز کے دوران ہوا۔ واقعے کے بعد آگ پر قابو پا لیا گیا اور مکمل تحقیقات شروع کر دی گئی ہیں تاکہ حادثے کی اصل وجہ معلوم کی جا سکے۔
حکام کے مطابق اس واقعے سے قطر کی گیس برآمدات متاثر نہیں ہوئیں اور نہ ہی ماحولیات کو کوئی خطرہ لاحق ہوا ہے۔
بھارت اور پاکستان کے سفارتی مشنز متاثرہ خاندانوں کی معاونت اور میتوں کی وطن واپسی کے انتظامات کے لیے قطری حکام کے ساتھ رابطے میں ہیں۔
