خلیج اردو
کئی ماہ کی معطلی کے بعد ایران اور متحدہ عرب امارات کے درمیان فضائی آپریشن دوبارہ شروع ہو گیا ہے۔ دبئی ایئرپورٹس کے شیڈول کے مطابق ایرانی فضائی کمپنی فلائی سپہران کی دبئی سے تہران جانے والی پرواز پیر کے روز روانگی کے لیے مقرر کی گئی۔
ایرانی سرکاری ذرائع ابلاغ نے بھی تصدیق کی ہے کہ دبئی اور تہران کے درمیان پروازوں کی بحالی کا آغاز پیر سے کیا گیا ہے، تاہم دبئی کی سول ایوی ایشن اتھارٹی کی جانب سے اس حوالے سے باضابطہ بیان جاری نہیں کیا گیا۔
فلائی سپہران کی ویب سائٹ کے مطابق تہران سے دبئی کے لیے اگلی دستیاب پرواز بدھ کے روز ہے، جبکہ اس کے بعد آئندہ ہفتے بدھ اور جمعہ کو مزید پروازیں شیڈول ہیں۔
ایرانی خبر رساں ادارے مہر نے امام خمینی بین الاقوامی ہوائی اڈے کے ایک عہدیدار کے حوالے سے بتایا کہ تہران اور دبئی کے درمیان پروازوں کی بحالی کا مقصد مسافروں کی سفری سہولت میں اضافہ اور دونوں ممالک کے درمیان فضائی روابط کو مضبوط بنانا ہے۔
اگرچہ جون کے وسط میں ایران اور امریکا کے درمیان جنگ بندی کا عبوری معاہدہ طے پا گیا تھا، تاہم اس کے باوجود ایران اور متحدہ عرب امارات کے درمیان فضائی آپریشن کئی ماہ تک معطل رہا۔
جمعے کے روز متحدہ عرب امارات کے وزیر خارجہ شیخ عبداللہ بن زاید النہیان اور ایرانی وزیر خارجہ عباس عراقچی کے درمیان ٹیلیفونک رابطہ بھی ہوا، جس میں خطے کی تازہ صورتحال پر تبادلۂ خیال کیا گیا۔
رپورٹ کے مطابق جنگ بندی کے بعد ایران میں بڑے پیمانے پر فوجی کارروائیاں رک چکی ہیں، تاہم توانائی کے بنیادی ڈھانچے پر وقفے وقفے سے حملوں اور دبئی بین الاقوامی ہوائی اڈے کو ماضی میں ایرانی میزائلوں اور ڈرونز سے لاحق خطرات کے باعث فضائی آپریشن متاثر ہوتا رہا۔
ایران اور متحدہ عرب امارات کے درمیان پروازوں کی بحالی کو دونوں ممالک کے درمیان سفری سہولت، تجارتی سرگرمیوں اور فضائی رابطوں کی بحالی کی جانب ایک اہم پیش رفت قرار دیا جا رہا ہے۔
