خلیج اردو
متحدہ عرب امارات کی پہلی مسافر ٹرین سروس اتحاد ریل کے افتتاحی سفر نے مسافروں کو ایک منفرد اور یادگار تجربہ فراہم کیا۔ فجیرہ کے مدینۃ الہلال اسٹیشن پر علی الصبح روایتی رزفہ رقص، عربی قہوے اور پُرجوش استقبال نے افتتاحی تقریب کو یادگار بنا دیا۔
افتتاحی سفر میں شامل مسافروں نے بتایا کہ ٹرین میں سوار ہونے کا پورا عمل انتہائی آسان اور تیز تھا۔ جدید کوچز میں کشادہ نشستیں، زیادہ لیگ روم، فولڈنگ میز، سامان لٹکانے کے لیے ہک، مفت وائی فائی، ہر نشست پر بجلی کے ساکٹ اور متوازن ائرکنڈیشننگ جیسی سہولیات فراہم کی گئیں۔
روانگی کے بعد مسافروں کو عربی قہوہ اور ایک اماراتی شیف کی تیار کردہ خصوصی چاکلیٹس پیش کی گئیں، جن میں "سیون اسپائسز” اور "کھجور و کیریمل” ذائقے شامل تھے۔ سفر کے دوران فجیرہ کے پہاڑوں پر طلوعِ آفتاب اور پھر صحرا کے دلکش مناظر نے مسافروں کو مسحور کر دیا۔
راستے میں کچھ مسافروں نے مفت انٹرنیٹ کی سہولت سے کام کیا جبکہ دیگر اہلِ خانہ کے ساتھ سفر سے لطف اندوز ہوتے رہے۔ ابوظبی پہنچنے سے قبل تمام مسافروں کو سینڈوچ، کراسان، کڑک چائے اور پانی پر مشتمل مفت ناشتے کے ڈبے بھی فراہم کیے گئے۔
مسافروں کے مطابق فجیرہ سے ابوظبی تک کا سفر نہایت خاموش، آرام دہ اور بغیر کسی دقت کے مکمل ہوا۔ ان کا کہنا تھا کہ یہ صرف ایک نئی ٹرانسپورٹ سروس نہیں بلکہ متحدہ عرب امارات میں سفر، رہائش اور کام کے انداز میں ایک اہم تبدیلی کی شروعات ہے۔
یہ افتتاحی سفر اس بات کی عکاسی کرتا ہے کہ اتحاد ریل مستقبل میں امارات کے مختلف شہروں کے درمیان تیز، محفوظ اور آرام دہ سفر کا نیا معیار قائم کر سکتی ہے۔
