خلیج اردو
دبئی کے ولی عہد شیخ حمدان بن محمد بن راشد آل مکتوم نے فرسٹ الخیل اسٹریٹ ڈویلپمنٹ پلان کی منظوری دے دی ہے، جس کے تحت شیخ زاید روڈ کے متوازی نئی راہداری تعمیر کی جائے گی۔ منصوبے سے مصروف اوقات میں شیخ زاید روڈ پر سفر کا وقت 51 فیصد تک کم ہونے اور سڑک کی گنجائش میں تقریباً 9 ہزار گاڑیاں فی گھنٹہ اضافے کی توقع ہے۔
18 ارب درہم کے ترقیاتی پیکج کا حصہ بننے والے اس منصوبے میں 15 کلومیٹر طویل بلند شاہراہ تعمیر کی جائے گی، جس میں دونوں سمتوں میں تین، تین لینیں ہوں گی۔ یہ راہداری تقریباً 26 لاکھ افراد کو سہولت فراہم کرے گی اور البرشاء، القوز، بزنس بے اور میدان تک آسان رسائی دے گی۔ تعمیراتی کام 2027 کی تیسری سہ ماہی میں شروع ہو کر 2030 کی آخری سہ ماہی میں مکمل ہونے کی توقع ہے۔
ایگزیکٹو کونسل کے اجلاس میں دبئی کلچرل اسٹریٹیجی 2033، دبئی کسٹمز اسٹریٹیجی 2030، دبئی پاپولیشن ناؤ، نجی تعلیمی شعبے میں اماراتی افراد کی ملازمتوں کے فروغ، دبئی انویسٹر رجسٹر، دبئی کے ایڈریس سسٹم کی نئی بصری شناخت اور اسلامی مالیاتی ٹیکنالوجی و جدت کے عالمی مرکز سمیت متعدد منصوبوں کی بھی منظوری دی گئی۔
ان اقدامات کا مقصد دبئی کو ثقافت، تجارت، سرمایہ کاری، شہری منصوبہ بندی اور اسلامی مالیاتی ٹیکنالوجی کے عالمی مرکز کے طور پر مزید مستحکم کرنا ہے۔
