خلیج اردو
متحدہ عرب امارات کی وزارتِ داخلہ نے گرمیوں کے موسم میں ٹریفک حادثات کی روک تھام کے لیے "حادثات سے پاک موسمِ گرما” کے عنوان سے ملک گیر آگاہی مہم شروع کر دی ہے۔ حکام نے تمام ڈرائیوروں پر زور دیا ہے کہ وہ سفر سے قبل گاڑیوں کا مکمل معائنہ کریں، ٹائروں کی باقاعدہ جانچ کریں، گاڑی پر غیر ضروری وزن نہ ڈالیں، تمام لائٹس اور اشارتی نظام درست رکھیں اور گاڑی میں آتش گیر مواد رکھنے سے گریز کریں۔
وزارتِ داخلہ کے مطابق یہ تین ماہ کی مہم موسمِ گرما اور تعطیلات کے دوران بڑھتے ہوئے سفری دباؤ کے پیشِ نظر شروع کی گئی ہے تاکہ ٹریفک حادثات اور زخمیوں کی تعداد میں کمی لائی جا سکے۔
حکام نے بتایا کہ گرمیوں میں ٹائر پھٹنے کی پانچ بڑی وجوہات سامنے آتی ہیں، جن میں گاڑی پر مقررہ حد سے زیادہ وزن لادنا، ٹائروں میں ہوا کا غلط دباؤ، مقررہ رفتار سے زیادہ تیز رفتاری، گرم سڑک سے پیدا ہونے والی شدید رگڑ، اور ٹائروں کا نامناسب یا غیر موزوں راستوں پر استعمال شامل ہیں۔
وزارت نے ڈرائیوروں کو ہدایت کی ہے کہ وہ ٹائروں کی حالت، تیاری کی تاریخ اور مناسب ہوا کے دباؤ کی باقاعدگی سے جانچ کریں۔ اس کے علاوہ انجن آئل، کولنگ سسٹم اور دیگر اہم پرزوں کی بروقت سروس بھی یقینی بنائیں تاکہ گرمی کے موسم میں گاڑی محفوظ حالت میں رہے۔
حکام کا کہنا ہے کہ صرف ٹائروں کی جانچ کافی نہیں بلکہ ذمہ دارانہ ڈرائیونگ، ٹریفک قوانین کی پابندی اور گاڑی کی مکمل دیکھ بھال ہی موسمِ گرما میں حادثات سے بچاؤ کا مؤثر ذریعہ ہے۔
