خلیج اردو
فیفا ورلڈ کپ کے پری کوارٹر فائنل میں آج مصر اور ارجنٹینا کی ٹیمیں آمنے سامنے ہوں گی، جہاں پہلی بار مصر کے اسٹار محمد صلاح اور ارجنٹینا کے کپتان لیونل میسی ایک ہی میدان میں مدِمقابل ہوں گے۔ میچ آج رات 8 بجے (یو اے ای وقت) اٹلانٹا میں کھیلا جائے گا۔
سات بار افریقن کپ آف نیشنز جیتنے والی مصر کی ٹیم پہلی مرتبہ ورلڈ کپ کے ناک آؤٹ مرحلے تک پہنچی ہے۔ مصر نے 2022 ورلڈ کپ کے لیے کوالیفائی نہیں کیا تھا جبکہ 2018 میں گروپ مرحلے سے باہر ہوگئی تھی۔
فیفا رینکنگ میں ارجنٹینا دوسرے اور مصر 24ویں نمبر پر ہے، تاہم رواں ورلڈ کپ میں جرمنی، برازیل، پرتگال اور نیدرلینڈز جیسی بڑی ٹیموں کی ناکامی کے بعد اپ سیٹ کے امکانات بڑھ گئے ہیں۔
لیونل میسی اس ٹورنامنٹ میں اب تک سات گول کر چکے ہیں، جن میں الجزائر کے خلاف ہیٹ ٹرک بھی شامل ہے۔ دوسری جانب محمد صلاح نے مصر کو تاریخ کی پہلی ورلڈ کپ فتح دلانے والا فیصلہ کن گول کیا اور ٹیم کو ناک آؤٹ مرحلے تک پہنچانے میں اہم کردار ادا کیا۔
ارجنٹینا کے کوچ لیونل اسکالونی نے کہا کہ یہ ورلڈ کپ ہر ٹیم کے لیے مشکل ثابت ہو رہا ہے، کوئی واضح فیورٹ نہیں۔ ان کے مطابق مصر ایک مضبوط ٹیم ہے، اس کے پاس اچھے کھلاڑی اور تجربہ کار کوچ موجود ہیں، جبکہ محمد صلاح کا مقابلہ کرنا خوشی کی بات ہوگی۔
مصر کے کوچ حسام حسن نے کہا کہ ان کی ٹیم نے حریف کے نام یا رینکنگ کو نہیں بلکہ اپنی کارکردگی کو سامنے رکھ کر تیاری کی ہے۔ ان کے بقول ورلڈ کپ خود کو منوانے کا بہترین موقع ہے۔
ماہرین کے مطابق مصر کو کامیابی کے لیے لیونل میسی کی نقل و حرکت اور کھیل پر مؤثر انداز میں قابو پانا ہوگا، جبکہ دفاعی غلطیوں سے بھی بچنا ہوگا۔ اگر مصر ارجنٹینا کو شکست دینے میں کامیاب ہو جاتا ہے تو یہ ورلڈ کپ کی تاریخ کے بڑے اپ سیٹس میں شمار ہوگا۔
