دبئی، ابوظہبی یا شارجہ؟ موسمِ گرما میں سب سے سستی پروازیں کس یو اے ای ائیرپورٹ سے مل رہی ہیں؟

خلیج اردو
متحدہ عرب امارات میں موسمِ گرما کی تعطیلات کے دوران سفر کرنے والے مسافر اگر صرف اپنے قریبی ائیرپورٹ سے ٹکٹ خریدنے کے بجائے دبئی، ابوظہبی اور شارجہ تینوں ائیرپورٹس کے کرایوں کا موازنہ کریں تو وہ سینکڑوں درہم کی بچت کر سکتے ہیں۔

ایک تجزیے کے مطابق 13 مقبول بین الاقوامی روٹس پر یکساں سفری تاریخوں کے لیے واپسی کے اکانومی ٹکٹوں کا جائزہ لیا گیا، جس میں بھارت، پاکستان، مصر، استنبول، باکو اور تبلیسی سمیت مختلف مقامات شامل تھے۔

نتائج کے مطابق زیادہ تر روٹس پر سب سے کم کرایے ابوظہبی سے دستیاب تھے، جبکہ بعض منزلوں کے لیے شارجہ اور دبئی زیادہ سستے ثابت ہوئے۔

مختلف شہروں کے لیے سب سے سستا ائیرپورٹ

تجزیے کے مطابق بھارت کے بیشتر شہروں، بشمول ممبئی، کوچی، چنئی، کوژیکوڈ اور بنگلورو کے لیے سب سے کم کرایے ابوظہبی سے دستیاب تھے، جبکہ دہلی کے لیے شارجہ سب سے سستا ائیرپورٹ رہا۔

پاکستان کے لیے صورتحال مختلف رہی، جہاں کراچی کا سب سے کم کرایہ دبئی جبکہ لاہور کے لیے شارجہ سے دستیاب تھا۔

تعطیلات گزارنے والوں کے لیے بھی واضح فرق سامنے آیا۔ استنبول کے لیے سب سے کم کرایہ شارجہ، باکو کے لیے ابوظہبی اور تبلیسی کے لیے شارجہ سے ملا۔

ماہرین کا کہنا ہے کہ اگر فی ٹکٹ چند سو درہم کی بچت ہو رہی ہو تو دوسرے امارت کے ائیرپورٹ تک سفر کرنا فائدہ مند ثابت ہو سکتا ہے، خاص طور پر خاندان کے ساتھ سفر کرنے والوں کے لیے۔

تاہم مسافروں کو حتمی فیصلہ کرتے وقت ایندھن، پارکنگ، ٹیکسی، سامان کے اضافی چارجز اور پرواز کے اوقات کو بھی مدنظر رکھنا چاہیے۔