خلیج اردو
بحرین کی ہائی کریمنل کورٹ نے ایران کی پاسدارانِ انقلاب (IRGC) کے لیے جاسوسی اور مملکتِ بحرین کے خلاف دشمنانہ سرگرمیوں میں معاونت کے الزام میں تین افراد کو عمر قید کی سزا سنا دی۔
عدالت نے دو الگ الگ مقدمات میں فیصلے سناتے ہوئے ضبط شدہ تمام اشیا سرکاری تحویل میں لینے کا بھی حکم دیا۔
پہلے مقدمے میں ایک مفرور ملزم، جو ملک سے باہر تھا اور سیکیورٹی اداروں کو مطلوب تھا، پر الزام تھا کہ اس نے بحرین میں موجود ایک شخص کو بھرتی کر کے حساس مقامات کی معلومات حاصل کیں تاکہ ایرانی حملوں کے دوران انہیں نشانہ بنایا جا سکے۔
دوسرے مقدمے میں ایک ملزم پر الزام عائد کیا گیا کہ وہ پاسدارانِ انقلاب سے منسلک ایک آن لائن اکاؤنٹ سے رابطے میں تھا اور اس نے بحرین میں ایرانی حملوں کی ویڈیوز اور اہم تنصیبات کے جغرافیائی محلِ وقوع (کوآرڈینیٹس) فراہم کیے، جس سے شہریوں کی جانوں کو خطرہ لاحق ہوا۔
بحرین کے پراسیکیوشن حکام کے مطابق تحقیقات میں ملزمان سے تفتیش، گواہوں کے بیانات، اور ضبط شدہ الیکٹرانک آلات کا فرانزک تجزیہ کیا گیا۔ حکام کا کہنا ہے کہ ملزمان کی فراہم کردہ معلومات ایرانی حملوں میں بنیادی کردار کا باعث بنیں، جن میں بحرین کی متعدد اہم تنصیبات کو نشانہ بنایا گیا۔
عدالتی کارروائی متعدد سماعتوں کے بعد مکمل ہوئی، جس میں ملزمان کو قانونی دفاع کا مکمل موقع فراہم کیا گیا، جس کے بعد عدالت نے تینوں کو عمر قید کی سزا سنا دی۔
بحرینی حکام کے مطابق جولائی میں ایران اور امریکا کے درمیان بڑھتی ہوئی کشیدگی کے دوران بحرین پر متعدد میزائل اور ڈرون حملے کیے گئے، تاہم فضائی دفاعی نظام نے آنے والے بیشتر حملوں کو ناکام بنا دیا۔ ایران نے ان حملوں کو امریکی کارروائیوں کے جواب میں کیا گیا اقدام قرار دیا تھا۔
