خلیج اردو
متحدہ عرب امارات کی پبلک پراسیکیوشن نے دبئی میں مبینہ دھماکوں سے متعلق جھوٹی خبر کی اشاعت کے معاملے میں تحقیقات کا دائرہ کار وسیع کرتے ہوئے متعلقہ صحافی اور خبر کی تیاری، منظوری اور اشاعت سے وابستہ ذمہ دار افراد کو طلب کر لیا ہے۔
یو اے ای کے اٹارنی جنرل ڈاکٹر حمد سیف الشامسی کے مطابق پبلک پراسیکیوشن نے خبر سے متعلق صحافی کا بیان ریکارڈ کیا ہے اور اس خبر کی تیاری، منظوری اور اشاعت میں شامل افراد سے بھی پوچھ گچھ کی جا رہی ہے۔
پراسیکیوشن کے مطابق تحقیقات کا مقصد یہ جاننا ہے کہ خبر کی تیاری اور اشاعت کے دوران ہر فرد کا کیا کردار تھا، کن طریقہ کار پر عمل کیا گیا اور خبر شائع کرنے سے قبل اس کی درستگی کی جانچ کے لیے قانونی اور پیشہ ورانہ اصولوں پر کس حد تک عمل کیا گیا۔
بیان میں کہا گیا ہے کہ تحقیقات مکمل ہونے کے بعد ذمہ داریوں کا تعین کیا جائے گا اور شواہد کی بنیاد پر ضروری قانونی کارروائی کی جائے گی۔
پبلک پراسیکیوشن نے واضح کیا کہ متعلقہ خبر رساں ادارے کی جانب سے خبر واپس لینے اور معذرت جاری کرنے سے تحقیقات ختم نہیں ہوتیں، بلکہ قانونی ذمہ داریوں کے تعین اور ضروری قانونی اقدامات کے لیے تفتیش بدستور جاری رہے گی۔
