خلیج اردو
دبئی کے محکمۂ معیشت و سیاحت (DET) نے ‘A Dubai Invite’ کے نام سے نئی سیاحتی مہم شروع کر دی ہے، جس کے تحت متحدہ عرب امارات کے رہائشی اپنے دوستوں اور رشتہ داروں کو دبئی آنے کی دعوت دے کر 3 ہزار درہم سے زائد مالیت کے ہوٹل، ریسٹورنٹس اور تفریحی مقامات پر خصوصی رعایتی پیکجز حاصل کر سکتے ہیں۔
یہ مہم 31 اکتوبر 2026 تک جاری رہے گی، جبکہ حاصل ہونے والے انعامات 31 دسمبر 2026 تک استعمال کیے جا سکیں گے۔
کون درخواست دے سکتا ہے؟
اس پروگرام میں 18 سال یا اس سے زائد عمر کے تمام اماراتی شہری اور درست ایمریٹس آئی ڈی رکھنے والے یو اے ای کے رہائشی حصہ لے سکتے ہیں۔
کن افراد کو نامزد کیا جا سکتا ہے؟
رہائشی ایسے دوستوں یا رشتہ داروں کو نامزد کر سکتے ہیں جو یو اے ای کے رہائشی نہ ہوں اور سیاحتی ویزے یا ویزا آن ارائیول کے ذریعے 20 جولائی سے 31 اکتوبر 2026 کے درمیان دبئی پہنچیں۔
ہر رہائشی ایک وقت میں پانچ افراد کو نامزد کر سکتا ہے، جبکہ پوری مہم کے دوران زیادہ سے زیادہ تین انعامی پیکجز حاصل کیے جا سکتے ہیں۔
درخواست کیسے دی جائے؟
درخواست گزار کو Visit Dubai کی ویب سائٹ پر آن لائن فارم بھرنا ہوگا، جس میں اپنی ایمریٹس آئی ڈی، تاریخ پیدائش، جنس اور ای میل کے علاوہ آنے والے مہمان کا نام، پاسپورٹ نمبر، قومیت، تاریخ پیدائش، رشتہ اور متوقع آمد کا مہینہ درج کرنا ہوگا۔
انعامات کب ملیں گے؟
نامزد مہمان کی دبئی آمد کی سرکاری تصدیق کے بعد محکمۂ سیاحت خودکار نظام کے ذریعے معلومات کی جانچ کرے گا، جس کے بعد اہل رہائشی کو ای میل کے ذریعے انعامی پیکج اور اسے استعمال کرنے کی تفصیلات بھیج دی جائیں گی۔
انعامات میں کیا شامل ہے؟
اہل افراد کو مجموعی طور پر 3 ہزار درہم سے زائد مالیت کے فوائد حاصل ہوں گے، جن میں:
- منتخب ہوٹلوں میں خصوصی رعایتیں
- ریسٹورنٹس میں ڈسکاؤنٹس
- تفریحی مقامات کے خصوصی آفرز
- دبئی کی دیگر سیاحتی اور تفریحی سرگرمیوں پر خصوصی رعایتیں
حکام کے مطابق اس مہم کا مقصد دبئی کے رہائشیوں کو اپنے دوستوں اور رشتہ داروں کو شہر کی سیاحت کی دعوت دینے کی ترغیب دینا اور انہیں دبئی کی عالمی معیار کی مہمان نوازی سے روشناس کرانا ہے۔
