فجیرہ کا وادی وریاہ یونیسکو کے عالمی ثقافتی ورثے کی فہرست میں شامل

خلیج اردو
متحدہ عرب امارات کے شہر فجیرہ میں واقع وادی وریاہ نیشنل پارک کو باضابطہ طور پر یونیسکو کے عالمی ثقافتی ورثے کی فہرست میں شامل کر لیا گیا ہے۔ یہ فیصلہ جنوبی کوریا کے شہر بوسان میں یونیسکو کی عالمی ورثہ کمیٹی کے 48ویں اجلاس میں کیا گیا۔

225 مربع کلومیٹر پر محیط وادی وریاہ نیشنل پارک متحدہ عرب امارات کا پہلا قدرتی مقام ہے جسے غیر معمولی عالمی قدرتی اہمیت کی بنیاد پر یہ اعزاز ملا ہے، جبکہ مجموعی طور پر یہ یو اے ای کا تیسرا عالمی ورثہ قرار پانے والا مقام بن گیا ہے۔

متحدہ عرب امارات کے وزیر ثقافت شیخ سالم بن خالد القاسمی نے اس کامیابی پر مبارکباد دیتے ہوئے کہا کہ وادی وریاہ کا یونیسکو کی فہرست میں شامل ہونا ملک کے قدرتی ورثے کے تحفظ کے عزم کا اہم سنگِ میل ہے۔

وادی وریاہ اپنی مستقل میٹھے پانی کی قدرتی گزرگاہوں کی وجہ سے منفرد حیثیت رکھتی ہے۔ اس پارک میں 300 سے زائد قدرتی چشمے اور 60 آبی دھارے موجود ہیں، جو سال بھر بہتے رہتے ہیں، جبکہ یہاں 9 کروڑ سال پرانی سمندری تہہ کی چٹانیں بھی محفوظ حالت میں موجود ہیں۔

فجیرہ ماحولیات اتھارٹی کی ڈائریکٹر جنرل اصیلہ عبداللہ المعلیٰ کے مطابق 2006 میں ہونے والے ابتدائی سروے میں یہاں 860 اقسام کے جاندار ریکارڈ کیے گئے تھے، جبکہ اب ان کی تعداد بڑھ کر 1,099 اقسام تک پہنچ چکی ہے۔

پارک میں نایاب اور خطرے سے دوچار جنگلی حیات بھی پائی جاتی ہے، جن میں عربی طہر، عربی کاراکل، بلینفورڈ لومڑی اور ڈریگن فلائی کی ایک نایاب قسم شامل ہے۔

وادی وریاہ کو 2009 میں متحدہ عرب امارات کا پہلا پہاڑی محفوظ قدرتی علاقہ قرار دیا گیا تھا، جبکہ ماحولیاتی نظام کی بحالی کے لیے 2013 میں اسے سیاحوں کے لیے بند کر دیا گیا۔ پارک کو جنوری 2026 میں محدود اور منظم گروپ وزٹس کے لیے دوبارہ کھولا گیا۔

اس کامیابی کے بعد وادی وریاہ، العین اور فایا قدیم زمینی منظرنامہ (شارجہ) کے بعد متحدہ عرب امارات کا تیسرا مقام بن گیا ہے جو یونیسکو کے عالمی ثقافتی ورثے کی فہرست میں شامل ہے۔