خلیج اردو
بھارت نے دبئی اور شمالی امارات کے لیے نئے قونصل جنرل کا تقرر کردیا ہے۔ ڈاکٹر ایمّادی وشنو وردھن ریڈی کو دبئی میں بھارت کا نیا قونصل جنرل مقرر کیا گیا ہے۔
دبئی میں بھارتی قونصلیٹ جنرل نے تصدیق کی ہے کہ 2008 بیچ کے انڈین فارن سروس افسر ڈاکٹر ریڈی دبئی اور شمالی امارات میں بھارت کے اعلیٰ سفارتی نمائندے کے طور پر خدمات انجام دیں گے۔
سرکاری سوانحی معلومات کے مطابق ڈاکٹر وشنو وردھن ریڈی اس سے قبل بھارت کے سفارتی مشنز میں اہم ذمہ داریاں نبھا چکے ہیں۔ انہوں نے میڈرڈ اور جنیوا میں بھارتی مشنز میں خدمات انجام دیں جہاں وہ دوطرفہ اور کثیرالجہتی تعلقات سے متعلق امور دیکھتے رہے۔
انہوں نے بھارتی وزارت خارجہ کے ہیڈکوارٹر میں بھی یورپ ویسٹ، لاطینی امریکا و کیریبین اور بیرونی تشہیر کے شعبوں میں کام کیا۔
بعد ازاں ڈاکٹر ریڈی نے حیدرآباد میں ریجنل پاسپورٹ آفیسر کے طور پر خدمات انجام دیں جبکہ تلنگانہ حکومت میں سرمایہ کاری کے فروغ اور بیرونی روابط کے لیے اسپیشل سیکریٹری بھی رہے۔
رپورٹس کے مطابق دبئی میں تعیناتی ان کی خلیجی خطے میں پہلی سفارتی ذمہ داری ہوگی۔
ڈاکٹر وشنو وردھن ریڈی دبئی میں بھارت کے موجودہ قونصل جنرل ستیش کمار سیون کی جگہ ذمہ داریاں سنبھالیں گے۔
