خلیج اردو
یو ایف سی کے فلائی ویٹ فائٹر ایلن ناسیمینٹو 34 سال کی عمر میں انتقال کر گئے۔ Allan Nascimento
الٹیمیٹ فائٹنگ چیمپئن شپ (UFC) کے مطابق ناسیمینٹو پیر 3 اگست کی صبح نیند کے دوران بظاہر دل کا دورہ پڑنے کے بعد بے ہوش حالت میں پائے گئے۔
یو ایف سی کے مطابق طبی ٹیم نے انہیں بچانے کی کوشش کی تاہم وہ جانبر نہ ہو سکے اور موقع پر ہی ان کی موت کی تصدیق کر دی گئی۔
ناسیمینٹو نے 2021ء میں UFC میں شمولیت اختیار کی اور فلائی ویٹ ڈویژن میں مقابلے کیے۔ ان کی آخری آکٹاگون فائٹ جون 2026ء میں مچ ریپوسو کے خلاف ہوئی تھی۔
برازیلین فائٹر معروف Chute Boxe جم میں کوچ ڈیاگو لیما کی زیرِ تربیت تھے۔ وہ سابق یو ایف سی لائٹ ویٹ چیمپئن چارلس اولیویرا اور یو ایف سی فائٹر ایلوس برینر سمیت کئی فائٹرز کے طویل عرصے تک ساتھی بھی رہے۔
یو ایف سی نے ناسیمینٹو کے انتقال پر ان کے خاندان، دوستوں، ساتھی فائٹرز اور دیگر عزیزوں سے تعزیت کا اظہار کیا۔
چوٹ باکسے اکیڈمی نے بھی ناسیمینٹو کو خراج عقیدت پیش کرتے ہوئے کہا کہ ٹیم نے صرف ایک ایتھلیٹ نہیں بلکہ ایک جنگجو، دوست، محنتی مقابل کھلاڑی اور غیر معمولی انسان کھو دیا ہے۔
اکیڈمی کے مطابق ناسیمینٹو اپنی عزم، عاجزی، احترام اور فائٹنگ اسپرٹ کی وجہ سے میدان کے اندر اور باہر دوسروں کے لیے ایک مثال تھے۔
ان کی موت کی خبر کے بعد مکسڈ مارشل آرٹس کی دنیا سے تعزیتی پیغامات کا سلسلہ جاری ہے۔
ان کے قریبی ساتھی اور برازیلین فائٹر چارلس اولیویرا نے سوشل میڈیا پر ناسیمینٹو کو اپنا بھائی قرار دیتے ہوئے کہا کہ زندگی بہت تیزی سے گزر جاتی ہے، اس لیے انسان کو اپنی زندگی بھرپور انداز میں گزارنی چاہیے۔
اولیویرا نے اپنے پیغام میں کہا کہ انہوں نے ایک بہترین انسان اور بھائی کو کھو دیا ہے اور یہ نقصان ان کے لیے انتہائی تکلیف دہ ہے۔
یو ایف سی فائٹر ایلوس برینر نے بھی ناسیمینٹو کو خراج عقیدت پیش کرتے ہوئے کہا کہ وہ ان سے محبت کرتے ہیں اور دعا کی کہ اللہ انہیں اپنی آغوش میں جگہ دے۔ برینر کے مطابق ناسیمینٹو ہمیشہ سب کے لیے ایک مثال رہیں گے۔
