دبئی ساؤتھ میں ورکشاپ حادثے کے باعث آگ، کئی ٹرک اور کارواں جل گئے

خلیج اردو

دبئی کے دبئی ساؤتھ علاقے میں 5 اگست کی علی الصبح لگنے والی آگ ورکشاپ میں پیش آنے والے ایک حادثے کے باعث لگی۔

دبئی سول ڈیفنس کے مطابق حادثے کے دوران کئی ٹرک اور کارواں آگ کی لپیٹ میں آ گئے تاہم واقعے میں کسی شخص کے زخمی ہونے کی اطلاع نہیں ہے۔

حکام کے مطابق فائر فائٹرز نے بروقت کارروائی کرتے ہوئے آگ پر قابو پا لیا اور صورتحال کو مزید پھیلنے سے روک دیا۔

آگ لگنے کے بعد دبئی ساؤتھ کے قریبی علاقوں میں رہائش پذیر افراد نے سوشل میڈیا پر زور دار آوازیں سنائی دینے کی اطلاع دی جبکہ بعض افراد نے علاقے سے اٹھتے ہوئے سیاہ دھویں کے بادل بھی دیکھے۔

حکام نے شہریوں کو ایک بار پھر ہدایت کی ہے کہ کسی بھی واقعے سے متعلق معلومات کے لیے صرف سرکاری اور تصدیق شدہ ذرائع پر انحصار کریں اور افواہیں پھیلانے سے گریز کریں۔

یو اے ای میں افواہیں پھیلانے پر قانونی کارروائی

حکام کے مطابق متحدہ عرب امارات میں افواہیں یا غیر مصدقہ معلومات پھیلانا قانوناً جرم ہے۔

متعلقہ قانون کے آرٹیکل 52 کے تحت انٹرنیٹ کے ذریعے جھوٹی خبریں، افواہیں یا گمراہ کن معلومات شائع، شیئر یا پھیلانے والے افراد کو کم از کم ایک سال قید اور ایک لاکھ درہم جرمانے کی سزا ہو سکتی ہے۔

اگر جھوٹی خبر یا افواہ عوامی رائے کو ریاستی اداروں کے خلاف بھڑکائے یا کسی بحران یا آفت کے دوران پھیلائی جائے تو سزا کم از کم دو سال قید اور 2 لاکھ درہم جرمانے تک بڑھ سکتی ہے۔