خلیج اردو
متحدہ عرب امارات نے اعضا کی پیوندکاری کے پروگرام کو مزید وسعت دینے کا فیصلہ کیا ہے، جس کے تحت چہرے، ہاتھوں، بازوؤں، بچہ دانی اور آنت کی پیوندکاری کو بھی شامل کیا جائے گا۔
وزارتِ صحت و انسدادِ امراض کے مطابق قومی پروگرام برائے اعضا و بافتوں کے عطیہ اور پیوندکاری "حیات” کے اگلے مرحلے میں عطیہ کیے جانے والے اعضا اور بافتوں کی اقسام میں اضافہ کیا جائے گا۔
منصوبے کے تحت آنت اور بچہ دانی کی پیوندکاری کے علاوہ پیچیدہ اعضا کی پیوندکاری بھی کی جائے گی، جس میں چہرہ، ہاتھ اور بازو شامل ہیں۔
وزارت کے مطابق ان جدید طبی طریقہ کار کے لیے مختلف شعبوں کے ماہرین پر مشتمل طبی ٹیموں کے درمیان آپریشن سے پہلے، دورانِ علاج اور بعد از علاج قریبی تعاون اور مربوط نظام کی ضرورت ہوگی۔
حیات پروگرام کے تحت قرنیہ، ہڈیوں، جلد اور دل کے والو کے عطیے کے دائرہ کار کو بھی وسعت دی جائے گی۔
اس کے علاوہ ایسے افراد سے اعضا کے عطیے کے نظام کو بھی فروغ دیا جائے گا، جن کے دل اور دورانِ خون کے مستقل طور پر بند ہونے کے بعد اعضا عطیہ کیے جا سکیں گے۔
وزارتِ صحت کا کہنا ہے کہ ان اقدامات سے اعضا اور بافتوں کی دستیابی میں اضافہ ہوگا، جس سے جان بچانے اور معیارِ زندگی بہتر بنانے والے علاج کے منتظر مریضوں کو فائدہ پہنچے گا۔
