خلیج اردو
دبئی میں ڈیلیوری رائیڈرز کے لیے شدید گرمی میں آرام اور خود کو ٹھنڈا رکھنے کے لیے میٹرو اسٹیشنز اور بس اسٹاپس پر خصوصی نشستیں فراہم کر دی گئی ہیں۔ پہلے رائیڈرز کو خالی جگہ تلاش کر کے بیٹھنا پڑتا تھا تاہم اب کئی مقامات پر ان کے لیے مخصوص سیٹیں مختص کر دی گئی ہیں۔
ڈیلیوری رائیڈر شہنواز خان کے مطابق میٹرو اسٹیشنز پہلے بھی گرمی سے بچنے اور چند منٹ آرام کرنے کے لیے مددگار تھے لیکن اب مخصوص جگہ ملنے سے سہولت مزید بڑھ گئی ہے۔ ان کا کہنا تھا کہ لوگ پہلے بھی رائیڈرز کی مشکلات کو سمجھتے تھے اور کئی بار اپنی نشستیں چھوڑ کر انہیں بیٹھنے کا موقع دیتے تھے۔
نیپالی ڈیلیوری رائیڈر گوپال شنکر نے کہا کہ بعض علاقوں میں آرام کی جگہیں کم ہوتی ہیں اور کام کے دوران گھر واپس جانا ہمیشہ ممکن نہیں ہوتا۔ ان کے مطابق میٹرو اسٹیشن کے اندر ٹھنڈی جگہ پر چند منٹ بیٹھنے کا موقع رائیڈرز کے لیے بہت اہم ہے۔
دبئی روڈز اینڈ ٹرانسپورٹ اتھارٹی (آر ٹی اے) نے رواں سال ڈیلیوری رائیڈرز کے لیے میٹرو اور بس اسٹیشنز پر 23 عارضی آرام گاہیں قائم کی ہیں، جو گزشتہ سال کے 15 مقامات سے زیادہ ہیں۔
ان سہولیات میں سینٹرپوائنٹ، البرجان، ڈی ایم سی سی، برجمان، ابن بطوطہ اور ای اینڈ میٹرو اسٹیشنز سمیت دبئی کے مختلف بس اسٹیشنز شامل ہیں۔
عام مسافروں نے بھی اس اقدام کو سراہا ہے اور کہا ہے کہ چند منٹ ایئرکنڈیشنڈ جگہ پر آرام کرنا ان افراد کے لیے بڑی سہولت ہے جو سارا دن گرمی میں موٹر سائیکل چلاتے ہیں۔
