دبئی کا المکتوم ایئرپورٹ دنیا کا سب سے بڑا خودکار مسافر ٹرانزٹ سسٹم حاصل کرے گا

خلیج اردو
دبئی ایوی ایشن سٹی کارپوریشن (DACC) نے المکتوم انٹرنیشنل ایئرپورٹ کی توسیع کے پہلے مرحلے کے لیے خودکار پیپل موور (APM) سسٹم کا کنٹریکٹ دے دیا ہے، جو مکمل ہونے کے بعد دنیا کا سب سے بڑا ایئرپورٹ ٹرانزٹ سسٹم ہوگا۔

یہ منصوبہ جاپان کی مٹسوبشی ہیوی انڈسٹریز، اس کی دبئی میں قائم ذیلی کمپنی MHI Mobility Engineering Services اور بھارتی کمپنی لارسن اینڈ ٹوبرو (L&T) پر مشتمل کنسورشیم کو دیا گیا ہے۔

نئے خودکار نظام کا نیٹ ورک تقریباً 50 کلومیٹر طویل ہوگا اور ایئرپورٹ کے 9 اسٹیشنز کو آپس میں جوڑے گا۔ یہ کسی بھی ایئرپورٹ پر قائم کیے جانے والے پیپل موور سسٹم کے مقابلے میں سب سے بڑا منصوبہ ہوگا۔

دنیا کے موجودہ بڑے ایئرپورٹ ٹرانزٹ سسٹمز میں امریکا کے ڈلاس فورٹ ورتھ انٹرنیشنل ایئرپورٹ کا اسکائی لنک شامل ہے جس کی لمبائی تقریباً 8 کلومیٹر ہے، جبکہ اٹلانٹا ایئرپورٹ کا "دی پلین ٹرین” سالانہ تقریباً 9 کروڑ 10 لاکھ مسافروں کو سہولت فراہم کرتا ہے۔

دبئی کا 50 کلومیٹر طویل نظام ان تمام ریکارڈز کو پیچھے چھوڑ دے گا۔

مٹسوبشی ہیوی انڈسٹریز اور اس کی ذیلی کمپنی 165 گاڑیوں، سگنلنگ ٹیکنالوجی، ڈیزائن، خریداری، ٹیسٹنگ اور مکمل نظام کی تیاری کی ذمہ دار ہوں گی، جبکہ لارسن اینڈ ٹوبرو سائٹ پر دیگر ذیلی نظام کی تعمیر اور تنصیب کرے گی۔

اس منصوبے کی تکمیل دسمبر 2031 تک متوقع ہے۔

المکتوم انٹرنیشنل ایئرپورٹ کو دنیا کے سب سے بڑے ایوی ایشن حب میں تبدیل کرنے کے منصوبے کے تحت اسے 2032 میں مکمل طور پر فعال کرنے کا ہدف رکھا گیا ہے۔ مکمل آپریشن کے بعد ایئرپورٹ سالانہ 26 کروڑ مسافروں کو سنبھالنے کی صلاحیت رکھے گا۔

نیا خودکار ٹرانزٹ نیٹ ورک ایئرپورٹ کے ٹرمینلز اور اہم سہولیات کو آپس میں ملائے گا، جس سے مسافروں کی آمدورفت تیز ہوگی اور بڑھتی ہوئی فضائی ضروریات کو پورا کرنے میں مدد ملے گی۔