خلیج اردو
حزب اللہ نے کہا ہے کہ امریکا کی جانب سے نئی پابندیاں عائد کیے جانے کے باوجود اسرائیل کے خلاف اس کی مزاحمت جاری رہے گی۔
حزب اللہ نے جمعے کو جاری بیان میں کہا کہ امریکا کی نئی پابندیاں اسے اسرائیل کے خلاف مزاحمت سے باز نہیں رکھ سکتیں۔ واشنگٹن نے حزب اللہ پر ایران کے لیے کام کرنے کا الزام عائد کرتے ہوئے گروپ کے خلاف نئی پابندیوں کا اعلان کیا ہے۔
امریکی محکمہ خزانہ نے جمعرات کو حزب اللہ کی قانونی حیثیت سے متعلق وضاحت میں ترمیم کرتے ہوئے کہا کہ تنظیم ایرانی حکومت کی خدمت میں ایران کی اسلامی انقلابی گارڈ کور کی کمان کے تحت سرگرم رہی ہے۔
امریکا نے حزب اللہ کو رقوم منتقل کرنے والے مبینہ نیٹ ورک سے منسلک 10 افراد پر بھی نئی پابندیاں عائد کی ہیں۔ امریکی حکام کے مطابق یہ نیٹ ورک حزب اللہ تک نقد رقوم منتقل کرنے میں ملوث ہے۔
