خلیج اردو
نئی رپورٹ کے مطابق 2025 میں متحدہ عرب امارات میں 52 ارب پتی افراد موجود تھے جن کی مجموعی دولت 201 ارب ڈالر ریکارڈ کی گئی۔ اس کے ساتھ یو اے ای دنیا کی 15 بڑی ارب پتی مارکیٹس میں شامل ہوگیا۔
Altrata کی Billionaire Census 2026 رپورٹ کے مطابق یو اے ای میں ارب پتی افراد کی تعداد ایک سال کے دوران 1.9 فیصد کم ہوئی تاہم ان کی مجموعی دولت 201 ارب ڈالر رہی۔
دنیا بھر میں ارب پتی افراد کی تعداد کے اعتبار سے یو اے ای 15ویں نمبر پر رہا جبکہ سعودی عرب 59 ارب پتی افراد کے ساتھ اس سے آگے ہے۔ سعودی ارب پتی افراد کی مجموعی دولت 175 ارب ڈالر رہی۔
دبئی دنیا کے بڑے ارب پتی مراکز میں شامل
دبئی دنیا کے ان شہروں میں مشترکہ طور پر آٹھویں نمبر پر رہا جہاں سب سے زیادہ ارب پتی افراد مقیم ہیں۔ 2025 میں دبئی میں 43 ارب پتی موجود تھے جو ایک سال پہلے کے مقابلے میں دو زیادہ ہیں۔
رپورٹ کے مطابق کاروبار اور ٹیکنالوجی کی عالمگیریت، سرمایہ کی نقل و حرکت، مالیاتی سہولیات، کاروباری نیٹ ورکس اور پرتعیش طرز زندگی کی سہولیات دنیا کے بڑے شہروں کو ارب پتی افراد کے لیے پرکشش بنا رہی ہیں۔
یو اے ای کی معاشی تنوع سے فائدہ
الٹرٹا کے مطابق مشرق وسطیٰ میں 2025 کے دوران ارب پتی افراد کی تعداد 5 فیصد بڑھ کر 254 ہوگئی۔ یو اے ای اور سعودی عرب میں تیل کے علاوہ دیگر شعبوں کی ترقی اور بڑے انفراسٹرکچر منصوبوں کو نئی دولت پیدا ہونے کی اہم وجوہات قرار دیا گیا۔
تاہم خطے کے ارب پتی افراد کی مجموعی دولت 4 فیصد کم ہوکر 700 ارب ڈالر رہی جس کی بڑی وجوہات کمزور توانائی قیمتیں اور علاقائی اسٹاک مارکیٹس کی ناقص کارکردگی بتائی گئی ہیں۔
عالمی سطح پر 2025 میں ارب پتی افراد کی تعداد 8.2 فیصد اضافے سے 3,795 ہوگئی جبکہ ان کی مجموعی دولت 12.8 فیصد بڑھ کر 15.1 ٹریلین ڈالر تک پہنچ گئی۔
رپورٹ کے مطابق مصنوعی ذہانت بھی ارب پتی دولت میں اضافے کا اہم ذریعہ بن رہی ہے۔ AI میں نمایاں سرمایہ کاری کرنے والی بڑی کمپنیوں نے 2024 اور 2025 کے دوران دیگر کمپنیوں کے مقابلے میں زیادہ مارکیٹ کیپیٹلائزیشن گروتھ ریکارڈ کی۔
