خلیج اردو
دبئی کے ایئرپورٹس پر مسافروں کے لیے نئی موبائل امیگریشن سروس ’’کلک اینڈ ٹریول‘‘ باقاعدہ لانچ کردی گئی ہے، جس کے تحت امیگریشن افسران روایتی کاؤنٹر کے بجائے ہینڈ ہیلڈ ڈیوائسز کے ذریعے مسافروں کی پاسپورٹ کنٹرول کارروائی مکمل کریں گے۔
نئی سروس میں بائیومیٹرک ٹیکنالوجی، چہرے کی شناخت، الیکٹرانک پاسپورٹ ریڈنگ، خودکار جانچ اور محفوظ نیٹ ورک کے ذریعے مسافر کی معلومات کی فوری تصدیق کی جاتی ہے۔
حکام کے مطابق ایک مسافر کی امیگریشن کارروائی مکمل ہونے میں تقریباً 12 سے 15 سیکنڈ لگتے ہیں، جس سے انتظار کا وقت کم اور ایئرپورٹ پر مسافروں کی روانی بہتر ہوگی۔
’’کلک اینڈ ٹریول‘‘ سروس متحدہ عرب امارات کے شہریوں، رہائشیوں، جی سی سی ممالک کے شہریوں اور غیر ملکی مسافروں کے لیے دستیاب ہے۔ سروس آمد اور روانگی دونوں مراحل میں استعمال کی جاسکتی ہے۔
دبئی ایئرپورٹس کے ڈپٹی اسسٹنٹ ڈائریکٹر ایئرپورٹس سروسز سعید احمد سعید کے مطابق یہ سروس امیگریشن کے روایتی مقررہ کاؤنٹر سے موبائل نظام کی جانب اہم تبدیلی ہے، جس میں امیگریشن افسر مسافر تک پہنچ کر اس کی سفری کارروائی مکمل کرسکتا ہے۔
انہوں نے کہا کہ اب ہر صورتحال میں مقررہ کاؤنٹر کی ضرورت نہیں، موبائل ڈیوائس اس کا متبادل بن سکتی ہے۔
موبائل سروس بچوں اور خصوصی معاونت کے ضرورت مند افراد کے لیے بھی مددگار ثابت ہوگی، کیونکہ انہیں امیگریشن کاؤنٹر تک جانے کے بجائے افسر خود موبائل ڈیوائس کے ساتھ ان کے پاس پہنچ کر کارروائی مکمل کرسکے گا۔
امیگریشن کارروائی مکمل ہونے کے بعد روانگی کے مسافر براہ راست سکیورٹی چیک جبکہ آنے والے مسافر کسٹمز کے مرحلے میں جاسکیں گے۔
آزمائشی مرحلے میں 31 ہزار سے زائد مسافر کلیئر
’’کلک اینڈ ٹریول‘‘ کے آزمائشی مرحلے کے دوران 31 ہزار 373 مسافروں کی کارروائی مکمل کی گئی، ہر لین دین میں اوسطاً 12 سے 15 سیکنڈ لگے۔
سروس میں چہرے کی شناخت، الیکٹرانک پاسپورٹ ریڈنگ، مسافر کی معلومات تک فوری رسائی اور ایئرپورٹ کے مختلف ٹرمینلز میں موبائل امیگریشن کارروائی کی سہولت شامل ہے۔
اکتوبر 2025 میں آزمائش شروع ہوئی
موبائل امیگریشن سروس کی پہلی آزمائش اکتوبر 2025 میں دبئی انٹرنیشنل ایئرپورٹ کے ٹرمینل 3 پر شروع کی گئی تھی، جس میں ابتدا میں خاندانوں کو شامل کیا گیا۔
مئی 2026 میں دوسرے مرحلے کے دوران آزمائش کا دائرہ دبئی کے تمام ایئرپورٹ ٹرمینلز اور مختلف اقسام کے مسافروں تک بڑھایا گیا۔
کامیاب آزمائشی مرحلے کے بعد ’’کلک اینڈ ٹریول‘‘ سروس 7 ستمبر 2026 کو باضابطہ طور پر لانچ کردی گئی۔
سروس دبئی ایئرپورٹس، ایمریٹس اور دیگر متعلقہ اداروں کے تعاون سے تیار کی گئی ہے، جس کا مقصد امیگریشن کے عمل کو تیز، لچکدار اور مسافروں کے لیے زیادہ آسان بنانا ہے۔
