برطانیہ میں فضائی ٹریفک کا بحران جاری، اتحاد ایئرویز نے لندن کی ایک پرواز منسوخ کردی

خلیج اردو
برطانیہ کے ایئر ٹریفک کنٹرول سسٹم میں تکنیکی خرابی کے باعث فضائی سفر میں خلل جاری ہے۔ اتحاد ایئرویز نے لندن ہیتھرو اور ابوظبی کے درمیان ایک پرواز منسوخ جبکہ دو پروازوں میں تاخیر کی تصدیق کردی۔

اتحاد ایئرویز کے مطابق ہیتھرو سے ابوظبی جانے والی پرواز ای وائی 64 منسوخ کردی گئی ہے جبکہ ای وائی 66 اب رات ساڑھے 9 بجے روانہ ہونے کی توقع ہے۔

ای وائی 68 کو بھی طویل تاخیر کا سامنا ہے کیونکہ اس کی آنے والی پرواز ای وائی 67 کو پیرس چارلس ڈیگال ایئرپورٹ منتقل کردیا گیا۔

اتحاد ایئرویز نے کہا کہ صورتحال مسلسل تبدیل ہو رہی ہے اور مزید تبدیلیاں بھی ممکن ہیں۔ متاثرہ مسافروں کے لیے ہوٹل اور متبادل سفری انتظامات کیے جا رہے ہیں۔

ایئرلائن نے برطانیہ سے آنے یا جانے والے مسافروں کو ہدایت کی ہے کہ روانگی سے قبل اپنی پرواز کی تازہ ترین صورتحال اتحاد ایئرویز کی ویب سائٹ پر چیک کریں اور مینیج یور بکنگ پورٹل میں رابطے کی معلومات بھی درست رکھیں تاکہ انہیں بروقت اپ ڈیٹس موصول ہوسکیں۔

برطانیہ میں یہ صورتحال نیشنل ایئر ٹریفک سروسز یعنی نیٹس کے ایئر ٹریفک کنٹرول سسٹم میں تکنیکی خرابی کے بعد پیدا ہوئی۔ خرابی کے باعث ہیتھرو، گیٹ وک، اسٹینسٹیڈ اور مانچسٹر سمیت بڑے ہوائی اڈوں سے پروازوں کی روانگی متاثر ہوئی۔

نیٹس کے مطابق فلائٹ پروسیسنگ سسٹم میں خرابی پیدا ہوئی تھی جسے بعد میں دور کردیا گیا تاہم پروازوں کا شیڈول معمول پر آنے میں مزید وقت لگنے کا خدشہ ہے۔

فلائٹ ٹریکنگ ڈیٹا کے مطابق منگل کو برطانیہ کے ہوائی اڈوں سے آنے اور جانے والی 1300 سے زائد پروازیں منسوخ ہوئیں جبکہ بدھ کو مزید 177 پروازیں منسوخ کی گئیں جن میں زیادہ تر ہیتھرو ایئرپورٹ کی پروازیں شامل ہیں۔

امارات اور قطر ایئرویز نے بھی برطانیہ جانے والے مسافروں کو سفری خلل سے متعلق آگاہ کردیا ہے جبکہ ریان ایئر اور وِز ایئر سمیت دیگر ایئرلائنز نے نیٹس کی کارکردگی پر تنقید کی ہے۔

برطانیہ کے فضائی ٹریفک نظام میں اس سے قبل اگست 2023 میں بھی بڑی خرابی پیدا ہوئی تھی جس کے باعث ملک بھر میں کئی گھنٹوں تک پروازیں متاثر رہیں اور کئی روز تک پروازوں کا شیڈول معمول پر نہ آسکا تھا۔