خلیج اردو
اتحاد ریل 30 ستمبر سے دبئی اور ابوظبی کے درمیان روزانہ 10 ٹرین سروسز چلائے گی، جس سے دونوں امارات کے درمیان سفر کرنے والے مسافروں کو دن بھر متعدد اوقات میں سفر کی سہولت میسر ہوگی۔
اتحاد ریل کے مطابق بدھ سے مسافر ابوظبی، دبئی اور فجیرہ کے درمیان براہ راست سفر کرسکیں گے، جبکہ دبئی کا ال یلایس اسٹیشن، جو جمیرہ گالف اسٹیٹس میں واقع ہے، بھی ریلوے نیٹ ورک کا حصہ بن جائے گا۔ ابوظبی اور فجیرہ کے درمیان روزانہ 6 ٹرین سروسز چلائی جائیں گی۔
دبئی سے ابوظبی کا سفر تقریباً ایک گھنٹہ 4 منٹ میں مکمل ہوگا، جبکہ دبئی سے فجیرہ براہ راست سفر کا دورانیہ تقریباً ایک گھنٹہ 10 منٹ ہوگا۔ اتحاد ریل کے مطابق مسافروں کو ٹرین میں مخصوص نشست، وائی فائی اور بجلی کی سہولت بھی دستیاب ہوگی، جس کے باعث سفر کے دوران کام کرنے، مطالعہ، آرام یا اہل خانہ اور دوستوں کے ساتھ وقت گزارنے کا موقع ملے گا۔
اتحاد ریل کے مطابق ابوظبی اور فجیرہ کے درمیان ابتدائی سروسز سے ایک لاکھ 50 ہزار سے زائد مسافر سفر کرچکے ہیں، جبکہ بار بار سفر کرنے والے مسافروں کی تعداد میں بھی اضافہ ہوا ہے اور صارفین عموماً تقریباً 10 دن پہلے اپنی بکنگ کراتے ہیں۔
اتحاد ریل کے مسافر نیٹ ورک میں مزید اسٹیشنز بھی مرحلہ وار شامل کیے جائیں گے۔ مدینۃ زاید اور لیوا کو 30 نومبر، جبکہ الظفرہ کے مزید اسٹیشنز کو 30 دسمبر سے نیٹ ورک میں شامل کرنے کا منصوبہ ہے۔ شارجہ کا یونیورسٹی سٹی اسٹیشن 30 مارچ 2027 کو کھولنے کا شیڈول ہے۔
