خلیج اردو
ایمریٹس ایئرلائن نے دبئی کا سفر کرنے والے مسافروں کیلئے مختلف مفت سہولیات اور خصوصی رعایتوں کا اعلان کردیا ہے، جس کا مقصد موسم سرما کے دوران دبئی آنے والے سیاحوں کو اضافی سہولت فراہم کرنا ہے۔
ایمریٹس کے مطابق مسافروں کو مجموعی طور پر 535 درہم مالیت کے مفت پاسز دیے جائیں گے، جن میں اٹلانٹس دبئی کا ایکواوینچر واٹرپارک، لاسٹ ورلڈ ایکویریم اور دبئی سٹی سائیٹ سیئنگ بس شامل ہیں۔ سٹی سائیٹ سیئنگ بس مسافروں کو برج خلیفہ سے تاریخی الفہیدی ڈسٹرکٹ سمیت دبئی کے اہم مقامات کی سیر کا موقع فراہم کرے گی۔
ایمریٹس کے ڈپٹی صدر عدنان کاظم کے مطابق ایئرلائن مسافروں کو مفت تفریحی سرگرمیوں کے ساتھ خصوصی پیشکشیں بھی فراہم کرے گی، تاکہ دبئی میں قیام کے دوران انہیں مزید سہولیات اور بہتر سفری تجربہ حاصل ہوسکے۔
مسافر اپنا ایمریٹس بورڈنگ پاس رعایتی کارڈ کے طور پر بھی استعمال کرسکیں گے۔ مائی ایمریٹس پاس کے ذریعے متحدہ عرب امارات میں سیکڑوں اسٹورز، تفریحی مقامات، اسپاز اور ریسٹورنٹس پر رعایتیں حاصل کی جاسکتی ہیں۔ اس کیلئے فزیکل یا ڈیجیٹل بورڈنگ پاس کے ساتھ شناختی دستاویز پیش کرنا ہوگی۔
ایمریٹس نے تمام کیبن کلاسز میں سفر کی تاریخ مفت اور لامحدود مرتبہ تبدیل کرنے کی سہولت بھی دی ہے، جبکہ مسافر 24 گھنٹے کیلئے بغیر اضافی فیس کرایہ محفوظ رکھنے اور کم ریفنڈ فیس سے بھی فائدہ اٹھاسکیں گے۔
ایئرلائن کے مطابق یہ پیشکش دبئی کیلئے اہل ریٹرن ٹکٹ 21 ستمبر سے 11 اکتوبر 2026 کے درمیان خریدنے والے مسافروں کیلئے دستیاب ہے، جبکہ سفر 24 ستمبر سے 13 دسمبر 2026 کے دوران کیا جاسکے گا۔
ایمریٹس اسکائی وارڈز کے ارکان دبئی انٹرنیشنل ایئرپورٹ پر دبئی ڈیوٹی فری اور مرحابا ایئرپورٹ میٹ اینڈ گریٹ سروسز سمیت شریک مقامات پر خریداری کے دوران اسکائی وارڈز مائلز حاصل اور استعمال بھی کرسکیں گے۔ اسکائی وارڈز ایوری ڈے پروگرام کے ذریعے مختلف ریٹیل، ڈائننگ اور رائیڈ سروسز پر مائلز کو کیش بیک میں تبدیل کرنے کی سہولت بھی موجود ہوگی۔
